ലോകകപ്പ്: മെക്സിക്കോയ്ക്കും കൊറിയയ്ക്കും വിജയത്തുടക്കം

ലോകകപ്പിന് ആവേശോജ്ജ്വലമായ തുടക്കം. ആദ്യ മത്സരങ്ങളില്‍ ആതിഥേയരായ മെക്സിക്കോയും ഏറ്റന്‍ കരുത്തരായ ദക്ഷിണ കൊറിയയും തകർപ്പൻ ജയം സ്വന്തമാക്കി. സ്വന്തം മണ്ണിൽ നടന്ന ഉദ്ഘാടന മത്സരത്തിൽ ദക്ഷിണാഫ്രിക്കയെ എതിരില്ലാത്ത രണ്ട് ഗോളുകൾക്കാണ് മെക്സിക്കോ പരാജയപ്പെടുത്തിയത്. ഗ്രൂപ്പ് എയിലെ മറ്റൊരു ആവേശപ്പോരാട്ടത്തിൽ ചെക്കിയയെ 2-1 എന്ന സ്കോറിന് അട്ടിമറിച്ച് ദക്ഷിണ കൊറിയയും തങ്ങളുടെ ലോകകപ്പ് കാമ്പെയ്ൻ മൂന്ന് പോയിന്റോടെ മനോഹരമാക്കി.

മെക്സിക്കോ സിറ്റിയിലെ ചരിത്രപ്രസിദ്ധമായ അസ്റ്റെക്ക സ്റ്റേഡിയത്തിൽ നടന്ന ഉദ്ഘാടന മത്സരം നാടകീയമായ സംഭവങ്ങൾക്കാണ് സാക്ഷ്യം വഹിച്ചത്. ജൂലിയൻ ക്വിനോനസ്, റൗൾ ഹിമനസ് എന്നിവർ ആതിഥേയർക്കായി വലകുലുക്കിയപ്പോൾ കളം കയ്യാങ്കളിക്കും ചുവപ്പ് കാർഡുകൾക്കും വേദിയായി. ദക്ഷിണാഫ്രിക്കന്‍ താരങ്ങളായ സ്പെഫെലോ സിതോലെയും തെംബാ സ്വാനെയും ചുവപ്പ് കണ്ട് പുറത്താക്കപ്പെട്ടപ്പോള്‍, മെക്സിക്കോയുടെ സീസര്‍ മോണ്ടസിനും അധികസമയത്ത് ചുവപ്പ് കാര്‍ഡ് ലഭിച്ചു.

ഗ്വാഡലഹാരയിൽ നടന്ന ഗ്രൂപ്പ് എയിലെ രണ്ടാം മത്സരത്തിൽ, ഒരു ഗോളിന് പിന്നിൽ നിന്ന ശേഷമായിരുന്നു ദക്ഷിണ കൊറിയയുടെ അവിസ്മരണീയമായ തിരിച്ചുവരവ്. മത്സരത്തിന്റെ തുടക്കത്തിൽ ലാഡിസ്ലാവ് ക്രെയ്ചിയുടെ ഗോളിലൂടെ ചെക്കിയയാണ് ആദ്യം ലീഡ് എടുത്തത്. എന്നാൽ ശക്തമായി തിരിച്ചടിച്ച കൊറിയയ്ക്കായി ഹ്വാങ് ഇൻ-ബിയോം സമനില ഗോൾ നേടി. തുടർന്ന് മത്സരത്തിന്റെ അവസാന ഘട്ടത്തിൽ പകരക്കാരനായി ഇറങ്ങി നിർണായക വിജയം സമ്മാനിച്ച ഓ ഹ്യോൻ-ഗ്യുവാണ് കൊറിയൻ പടയുടെ ഹീറോയായത്.

ഇതോടെ ഗ്രൂപ്പ് എയില്‍ മെക്സിക്കോയും ദക്ഷിണ കൊറിയയും വിജയത്തോടെ മൂന്ന് പോയിന്റ് വീതം സ്വന്തമാക്കി. അടുത്ത മത്സരത്തില്‍ മെക്സിക്കോയും ദക്ഷിണ കൊറിയയും നേര്‍ക്കുനേര്‍ എത്തും. അതേസമയം, ആദ്യ മത്സരങ്ങളില്‍ പരാജയപ്പെട്ട ദക്ഷിണാഫ്രിക്കയും ചെക്കിയയും തിരിച്ചുവരവ് ലക്ഷ്യമിട്ട് അടുത്ത പോരാട്ടത്തിനിറങ്ങും.