‘കേരളം യുഡിഎഫിനൊപ്പം’; ഭരണം പിടിക്കുമെന്ന് ഭൂരിഭാഗം സർവേകളും, എൽഡിഎഫിന് തിരിച്ചടി

കേരള നിയമസഭാ തിരഞ്ഞെടുപ്പിൽ യുഡിഎഫ് വലിയ മുന്നേറ്റം നടത്തുമെന്നും സംസ്ഥാനത്ത് ഭരണമാറ്റമുണ്ടാകുമെന്നും പ്രവചിച്ച് വിവിധ എക്സിറ്റ് പോൾ ഫലങ്ങൾ. മിക്ക സർവേ ഏജൻസികളും യുഡിഎഫ് കേവല ഭൂരിപക്ഷം മറികടന്ന് അധികാരത്തിലെത്തുമെന്നാണ് സൂചിപ്പിക്കുന്നത്. ഭൂരിഭാഗം സർവേകളും യുഡിഎഫിന് 70-ന് മുകളിൽ സീറ്റുകൾ ലഭിക്കുമെന്ന് പ്രവചിക്കുമ്പോൾ, ആക്സിസ് മൈ ഇന്ത്യ യുഡിഎഫിന് പരമാവധി 90 സീറ്റുകൾ വരെ ലഭിക്കാമെന്നും കണക്കുകൂട്ടുന്നു.

വിവിധ ഏജൻസികളുടെ കണക്കുകൾ പരിശോധിക്കുമ്പോൾ യുഡിഎഫിന് വ്യക്തമായ മേൽക്കൈ ദൃശ്യമാണ്. ന്യൂസ് 18-ന്റെ എക്സിറ്റ് പോൾ പ്രകാരം യുഡിഎഫ് 70-80 വരെ സീറ്റുകൾ നേടുമ്പോൾ എൽഡിഎഫിന് 58-68 സീറ്റുകൾ മാത്രമേ ലഭിക്കൂ. ടൈംസ് നൗ യുഡിഎഫിന് 72-84 സീറ്റുകളും എൽഡിഎഫിന് 52-61 സീറ്റുകളുമാണ് പ്രവചിക്കുന്നത്. ആക്സിസ് മൈ ഇന്ത്യയുടെ കണക്കനുസരിച്ച് യുഡിഎഫ് 78-90 സീറ്റുകൾ വരെ നേടി കരുത്തുറ്റ ഭരണം കാഴ്ചവെക്കുമെന്നാണ് സൂചന.

അതേസമയം, ബിജെപി നയിക്കുന്ന എൻഡിഎയ്ക്ക് കേരളത്തിൽ വലിയ മുന്നേറ്റം നടത്താൻ കഴിയില്ലെന്നാണ് സർവേകൾ പറയുന്നത്. ന്യൂസ് 18 സർവേ എൻഡിഎയ്ക്ക് 0-4 സീറ്റുകൾ നൽകുമ്പോൾ ടൈംസ് നൗ 3-7 സീറ്റുകൾ വരെ പ്രവചിക്കുന്നുണ്ട്. പീപ്പിൾസ് പൾസ്, മാട്രിക്സ് എക്സിറ്റ് പോളുകൾ പ്രകാരം യുഡിഎഫ് 70-75 സീറ്റുകളും എൽഡിഎഫ് 60-65 സീറ്റുകളും എൻഡിഎ 3-5 സീറ്റുകളും നേടുമെന്നാണ് റിപ്പോർട്ട്.

പശ്ചിമ ബംഗാൾ ഉൾപ്പെടെയുള്ള സംസ്ഥാനങ്ങളിലെ വോട്ടെടുപ്പ് പൂർത്തിയായതോടെയാണ് കേരളത്തിലെയും എക്സിറ്റ് പോൾ ഫലങ്ങൾ പുറത്തുവന്നത്. തദ്ദേശ തിരഞ്ഞെടുപ്പിലുണ്ടായ മുന്നേറ്റം നിയമസഭയിലും പ്രതിഫലിക്കുമെന്ന ഉറച്ച വിശ്വാസത്തിലായിരുന്നു യുഡിഎഫ് ഇത്തവണ തിരഞ്ഞെടുപ്പിനെ നേരിട്ടത്. ഭരണവിരുദ്ധ തരംഗമുണ്ടായെന്നും യുഡിഎഫിന്റെ സീറ്റ് നില 90 കടക്കുമെന്നും നേതാക്കൾ അവകാശപ്പെടുന്നുണ്ട്. ഫലസൂചനകൾ അനുകൂലമായതോടെ യുഡിഎഫ് ക്യാമ്പുകളിൽ മുഖ്യമന്ത്രി ചർച്ചകളും സജീവമായിക്കഴിഞ്ഞു.