കരിഞ്ഞുണങ്ങി രണ്ടില, സംപൂജ്യരായി കേരള കോണ്‍ഗ്രസ് മാണി ഗ്രൂപ്പ്

കേരള നിയമസഭാ തിരഞ്ഞെടുപ്പ് ഫലങ്ങള്‍ പുറത്തുവരുമ്പോള്‍ ഭരണകക്ഷിയായ എല്‍.ഡി.എഫിലെ പ്രമുഖ ഘടകകക്ഷിയായ കേരള കോണ്‍ഗ്രസ് (എം) കനത്ത തകര്‍ച്ചയെ നേരിടുന്നു. പാര്‍ട്ടിയുടെ ശക്തികേന്ദ്രങ്ങളിലടക്കം മത്സരിച്ച 12 സീറ്റുകളിലും സ്ഥാനാര്‍ത്ഥികള്‍ നിലവില്‍ പിന്നിലാണെന്ന റിപ്പോര്‍ട്ടുകളാണ് പുറത്തുവരുന്നത്. സംസ്ഥാനത്തുടനീളം ആഞ്ഞടിക്കുന്ന ശക്തമായ യു.ഡി.എഫ് തരംഗത്തിന്റെ ഏറ്റവും വലിയ ഇരയായി ജോസ് കെ. മാണിയും പാര്‍ട്ടിയും മാറിയിരിക്കുകയാണ്.

കേരള കോണ്‍ഗ്രസ് രാഷ്ട്രീയത്തിന്റെ സിരാകേന്ദ്രമായി അറിയപ്പെടുന്ന പാലായില്‍ പാര്‍ട്ടി ചെയര്‍മാന്‍ ജോസ് കെ. മാണി പിന്നിലാണെന്നത് രാഷ്ട്രീയ കേരളത്തെ ഞെട്ടിച്ചിരിക്കുകയാണ്. പാലായിലെ തിരിച്ചടിക്ക് പുറമെ, പാര്‍ട്ടിയിലെ രണ്ടാമനും ജലവിഭവ വകുപ്പ് മന്ത്രിയുമായ റോഷി അഗസ്റ്റിനും ഇടുക്കി മണ്ഡലത്തില്‍ പിന്നിലാണ്. മധ്യതിരുവിതാംകൂറിലെ പാര്‍ട്ടിയുടെ സ്വാധീനമേഖലകളില്‍ എല്‍.ഡി.എഫിനുണ്ടായ ഈ തകര്‍ച്ച ഇടതുമുന്നണിക്ക് വലിയ തിരിച്ചടിയാണ് സമ്മാനിക്കുന്നത്.

മറ്റു പ്രമുഖ മണ്ഡലങ്ങളിലും കേരള കോണ്‍ഗ്രസ് എമ്മിന് സ്ഥിതി ആശാവഹമല്ല. കാഞ്ഞിരപ്പള്ളിയില്‍ മുതിര്‍ന്ന നേതാവ് എന്‍. ജയരാജ് കോണ്‍ഗ്രസിന്റെ റോണി കെ. ബേബിയേക്കാള്‍ ഏകദേശം 3,000 വോട്ടുകള്‍ക്ക് പിന്നിലാണ്. പൂഞ്ഞാറിലാകട്ടെ, എല്‍.ഡി.എഫ് സ്ഥാനാര്‍ത്ഥി സെബാസ്റ്റ്യന്‍ കുളത്തുങ്കലും 3000-ല്‍ അധികം വോട്ടുകള്‍ക്ക് പിന്നിലായി തുടരുന്നത് പാര്‍ട്ടിയുടെ പതനം പൂര്‍ണ്ണമാക്കുന്നു.

പി.ജെ. ജോസഫുമായുള്ള തര്‍ക്കത്തിന് ശേഷം യു.ഡി.എഫ് വിട്ട് എല്‍.ഡി.എഫിലെത്തിയ കേരള കോണ്‍ഗ്രസ് (എം), കഴിഞ്ഞ നിയമസഭാ തിരഞ്ഞെടുപ്പിലും തദ്ദേശ തിരഞ്ഞെടുപ്പിലും കോട്ടയം ഉള്‍പ്പെടെയുള്ള ജില്ലകളില്‍ ഇടതുമുന്നണിക്ക് വലിയ മുന്നേറ്റം നേടിക്കൊടുത്തിരുന്നു. 2021-ല്‍ 12 സീറ്റില്‍ മത്സരിച്ച പാര്‍ട്ടി അഞ്ച് സീറ്റില്‍ വിജയിച്ചിരുന്നു. എന്നാല്‍ ഭരണവിരുദ്ധ വികാരം ശക്തമായ ഇത്തവണ പാര്‍ട്ടിയുടെ എല്ലാ കണക്കുകൂട്ടലുകളും തെറ്റിക്കുന്ന പ്രകടനമാണ് കാണുന്നത്.

അതേസമയം, യു.ഡി.എഫിന്റെ ഭാഗമായ കേരള കോണ്‍ഗ്രസ് ജേക്കബ് വിഭാഗം മത്സരിച്ച ഏഴ് സീറ്റുകളിലും നിലവില്‍ മുന്നിട്ടുനില്‍ക്കുന്നുണ്ടെന്നത് ശ്രദ്ധേയമാണ്. എല്‍.ഡി.എഫിന് അനുകൂലമായ കാറ്റ് വീശാത്തത് മധ്യതിരുവിതാംകൂറിലെ ക്രൈസ്തവ വോട്ടുകളില്‍ ഉണ്ടായ വിള്ളലാണോ എന്ന പരിശോധനയിലാണ് മുന്നണി നേതൃത്വം. ജോസ് കെ. മാണിയുടെ ഇടതുപക്ഷ ചായ്വ് പാര്‍ട്ടിയുടെ പരമ്പരാഗത വോട്ടര്‍മാര്‍ പൂര്‍ണ്ണമായും അംഗീകരിച്ചില്ലെന്ന സൂചനയും ഈ ഫലങ്ങള്‍ നല്‍കുന്നു.

തിരഞ്ഞെടുപ്പ് പ്രഖ്യാപനത്തിന് മുമ്പ് ഉയര്‍ന്നുകേട്ട മുന്നണി മാറ്റ വാര്‍ത്തകള്‍ തള്ളിക്കൊണ്ട് കേരള കോണ്‍ഗ്രസിനെ ഇടതുപക്ഷത്ത് തന്നെ ചേര്‍ത്തുനിര്‍ത്തിയ ജോസ് കെ. മാണിക്ക് ഈ ഫലം വലിയ രാഷ്ട്രീയ വെല്ലുവിളിയാണ് ഉയര്‍ത്തുന്നത്. പാര്‍ട്ടിയുടെ അടിത്തറ ഇളകിയ ഈ സാഹചര്യത്തില്‍ വരുംദിവസങ്ങളില്‍ കേരള കോണ്‍ഗ്രസ് എമ്മിനുള്ളില്‍ വലിയ ചര്‍ച്ചകളും രാഷ്ട്രീയ പുനര്‍ചിന്തകളും ഉണ്ടാകുമെന്ന് ഉറപ്പാണ്. വോട്ടെണ്ണല്‍ അവസാന ഘട്ടത്തിലേക്ക് കടക്കുമ്പോള്‍ തിരിച്ചുവരവിനുള്ള സാധ്യതകള്‍ മങ്ങുകയാണ്.