“കാന്തപുരത്തിന് ഇ.ഡി പേടി, ഗ്രാൻഡ് മുഫ്തി സ്ഥാനം സ്വയം ചമഞ്ഞത്”; കടുത്ത വിമർശനവുമായി കെ.എൻ.എം മർക്കസുദ്ദഅവ

ഇന്ത്യയിൽ മുസ്ലിങ്ങൾ സുരക്ഷിതരാണെന്ന കാന്തപുരം എ.പി. അബൂബക്കർ മുസ്ലിയാരുടെ പ്രസ്താവനയ്ക്കെതിരെ രൂക്ഷമായ വിമർശനവുമായി കേരള നദ്‌വത്തുൽ മുജാഹിദീൻ (കെ.എൻ.എം) മർക്കസുദ്ദഅവ വിഭാഗം. കാന്തപുരത്തിന് കേന്ദ്ര ഏജൻസിയായ ഇ.ഡി.യെ (എൻഫോഴ്സ്‌മെന്റ് ഡയറക്ടറേറ്റ്) ഭയമാണെന്നും, ആ ഭയമാണ് പ്രധാനമന്ത്രിയെ പ്രീണിപ്പിക്കുന്ന ഇത്തരം പ്രസ്താവനകൾക്ക് പിന്നിലെന്നും മർക്കസുദ്ദഅവ സെക്രട്ടറി ഡോ. ഐ.പി. അബ്ദുസലാം ആരോപിച്ചു.

കാന്തപുരത്തെ ആരും ഇന്ത്യയുടെ ഗ്രാൻഡ് മുഫ്തിയായി നിയമിച്ചിട്ടില്ലെന്നും സ്വന്തം താൽപ്പര്യങ്ങൾക്കായി അദ്ദേഹം സ്വയം പദവികൾ ചമയുകയാണെന്നും അബ്ദുസലാം പരിഹസിച്ചു. വ്യക്തിപരമായ നേട്ടങ്ങൾ ലക്ഷ്യം വെച്ചാണ് സമുദായത്തിന്റെ അവസ്ഥയെ തെറ്റായി ചിത്രീകരിക്കുന്നതെന്നും അദ്ദേഹം കൂട്ടിച്ചേർത്തു. ഡൽഹിയിൽ പ്രധാനമന്ത്രി നരേന്ദ്ര മോദിയുമായുള്ള കൂടിക്കാഴ്ചയ്ക്ക് ശേഷം സി.എൻ.എൻ ന്യൂസ് 18-ന് നൽകിയ അഭിമുഖത്തിലാണ് രാജ്യത്ത് മുസ്ലിങ്ങൾക്ക് അരക്ഷിതാവസ്ഥയില്ലെന്ന് കാന്തപുരം പറഞ്ഞത്.

പ്രതിപക്ഷ നേതാവ് വി.ഡി. സതീശനും കാന്തപുരത്തിന്റെ നിലപാടിനെ തള്ളി രംഗത്തെത്തി. മുസ്ലിങ്ങൾ സുരക്ഷിതരാണെന്നത് കാന്തപുരത്തിന്റെ മാത്രം അഭിപ്രായമാണെന്നും ഇന്ത്യയിൽ മുസ്ലിങ്ങളും ക്രിസ്ത്യാനികളും ഉൾപ്പെടെയുള്ള ന്യൂനപക്ഷങ്ങൾ വലിയ തോതിൽ ആക്രമിക്കപ്പെടുകയും അരക്ഷിതാവസ്ഥ അനുഭവിക്കുകയും ചെയ്യുന്നുണ്ടെന്ന് അദ്ദേഹം പറഞ്ഞു. ഫാസിസ്റ്റ് ഭരണകൂടത്തിന് കീഴിൽ സമുദായം നേരിടുന്ന വെല്ലുവിളികളെ കാന്തപുരം വിസ്മരിക്കുകയാണെന്നും സതീശൻ കുറ്റപ്പെടുത്തി.

എന്നാൽ, കാന്തപുരത്തെ ന്യായീകരിച്ചുകൊണ്ട് സമസ്ത എ.പി. വിഭാഗം രംഗത്തെത്തിയിട്ടുണ്ട്. രാജ്യത്തെ ഭരണഘടനയ്ക്കും വ്യവസ്ഥാപിത ഭരണകൂടത്തിനും കീഴിൽ ന്യൂനപക്ഷം സുരക്ഷിതമാണെന്നാണ് അദ്ദേഹം ഉദ്ദേശിച്ചതെന്ന് സമസ്ത സെക്രട്ടറി സയ്യിദ് ഇബ്രാഹിമുൽ ഖലീലുൽ ബുഖാരി തങ്ങൾ വിശദീകരിച്ചു. തന്റെ കേരള യാത്രയ്ക്കിടെ ലഭിച്ച പരാതികൾ പ്രധാനമന്ത്രിയെ നേരിട്ട് അറിയിക്കാനാണ് അദ്ദേഹം കൂടിക്കാഴ്ച നടത്തിയതെന്നും തങ്ങൾ വ്യക്തമാക്കി.

കാന്തപുരത്തിന്റെ പ്രസ്താവന മുസ്ലിം സംഘടനകൾക്കിടയിൽ വലിയ ചർച്ചകൾക്ക് വഴിമാറുമ്പോഴും മുസ്ലിം ലീഗും സമസ്ത ഇ.കെ. വിഭാഗവും വിഷയത്തിൽ ഇതുവരെ ഔദ്യോഗിക പ്രതികരണങ്ങൾ നടത്തിയിട്ടില്ല.