സ്‌കൂള്‍ പരീക്ഷകളുടെ എണ്ണം കുറക്കണമെന്ന ആവശ്യവുമായി കാന്തപുരം, സമയ മാറ്റം തടയാനുള്ള നീക്കമെന്ന് സൂചന, എതിര്‍ക്കാതെ മന്ത്രിയും

സംസ്ഥാനത്തെ സ്‌കൂള്‍ സമയമാറ്റം സംബന്ധിച്ച വിവാദങ്ങള്‍ക്കിടെ, നിലവിലെ പഠനസമയം വര്‍ധിപ്പിക്കാതെ അധ്യയനസമയം കണ്ടെത്താന്‍ പുതിയ നിര്‍ദേശങ്ങളുമായി കാന്തപുരം എ.പി. അബൂബക്കര്‍ മുസ്ലിയാര്‍. വര്‍ഷത്തിലെ പരീക്ഷകളുടെ എണ്ണം കുറയ്ക്കണമെന്നും, വാര്‍ഷിക അവധി പുനഃക്രമീകരിക്കണമെന്നുമുള്ള നിര്‍ദേശങ്ങളാണ് കാന്തപുരം മുന്നോട്ട് വെക്കുന്നത്. ഇത് സ്‌കൂള്‍ സമയം വര്‍ധിപ്പിക്കാനുള്ള സര്‍ക്കാര്‍ നീക്കത്തെ തടയാനുള്ള കാന്തപുരത്തിന്റെ ബദല്‍ മാര്‍ഗമായാണ് വിലയിരുത്തപ്പെടുന്നത്. നിര്‍ദേശങ്ങള്‍ പഠിക്കാമെന്ന് വിദ്യാഭ്യാസമന്ത്രി ഉറപ്പുനല്‍കിയതായും കാന്തപുരം വ്യക്തമാക്കി.

വര്‍ഷത്തില്‍ മൂന്ന് തവണ നടത്തുന്ന പരീക്ഷകള്‍ മറ്റു സംസ്ഥാനങ്ങളിലേതുപോലെ രണ്ടായി ചുരുക്കണമെന്നതാണ് കാന്തപുരം മുന്നോട്ടുവെച്ച പ്രധാന നിര്‍ദേശം. ഇത് പഠനസമയം ലാഭിക്കാന്‍ സഹായിക്കുമെന്നും അദ്ദേഹം ചൂണ്ടിക്കാട്ടി. ഇതിനൊപ്പം, കടുത്ത ചൂട് അനുഭവപ്പെടുന്ന മെയ് മാസവും, മഴക്കാലം ആരംഭിക്കുന്ന ജൂണ്‍ മാസവും ചേര്‍ത്ത് വാര്‍ഷിക അവധി നല്‍കണമെന്നും അദ്ദേഹം ആവശ്യപ്പെട്ടു. നിലവില്‍ ഏപ്രില്‍, മെയ് മാസങ്ങളിലാണ് വേനലവധി.

സ്‌കൂള്‍ അധ്യയന ദിവസങ്ങള്‍ വര്‍ധിപ്പിക്കാനുള്ള സര്‍ക്കാര്‍ ആലോചനകള്‍ക്കെതിരെ മതസംഘടനകള്‍ ഉള്‍പ്പെടെയുള്ളവരില്‍ നിന്ന് എതിര്‍പ്പ് ഉയര്‍ന്നിരുന്നു. ഈ സാഹചര്യത്തിലാണ് പരീക്ഷകള്‍ കുറച്ചും അവധി പുനഃക്രമീകരിച്ചും നിലവിലെ സമയക്രമം മാറ്റാതെ തന്നെ കൂടുതല്‍ അധ്യയന മണിക്കൂറുകള്‍ കണ്ടെത്താമെന്ന ബദല്‍ നിര്‍ദേശം കാന്തപുരം മുന്നോട്ടുവെക്കുന്നത്. ഇത് സര്‍ക്കാരിന്റെ സമയമാറ്റ നീക്കത്തെ പരോക്ഷമായി പ്രതിരോധിക്കാനുള്ള നീക്കമായാണ് വ്യാഖ്യാനിക്കപ്പെടുന്നത്.

താന്‍ മുന്നോട്ടുവെച്ച വിഷയങ്ങള്‍ മന്ത്രിയുടെ ശ്രദ്ധയില്‍പ്പെടുത്തിയിട്ടുണ്ടെന്നും, പഠിച്ച ശേഷം മറുപടി നല്‍കാമെന്നാണ് അദ്ദേഹം അറിയിച്ചതെന്നും കാന്തപുരം പറഞ്ഞു. നിര്‍ദേശങ്ങളെ മന്ത്രി എതിര്‍ത്തിട്ടില്ലെന്നത് ശ്രദ്ധേയമാണ്. എല്ലാ കാര്യങ്ങളും കൂടിയാലോചിച്ച് തീരുമാനിച്ചാല്‍ തര്‍ക്കങ്ങള്‍ ഒഴിവാക്കാമെന്നും കാന്തപുരം കൂട്ടിച്ചേര്‍ത്തു.