രാഹുല്‍ മാങ്കൂട്ടത്തില്‍ വിഷയത്തില്‍ അതിജീവിതകള്‍ക്ക് പൂര്‍ണ്ണ പിന്തുണ, കോണ്‍ഗ്രസ് നിലപാടിനെ സ്വാഗതം ചെയ്ത് കെ.കെ രമ

യൂത്ത് കോണ്‍ഗ്രസ് അധ്യക്ഷ സ്ഥാനത്ത് നിന്ന് രാഹുല്‍ മാങ്കൂട്ടത്തില്‍ രാജി വെച്ച വിഷയത്തില്‍ കോണ്‍ഗ്രസ് സ്വീകരിച്ച കൃത്യതയാര്‍ന്ന നിലപാടിനെ സ്വാഗതം ചെയ്ത് കെ.കെ. രമ എംഎല്‍എ. മുന്‍പത്തെപ്പോലെ ഈ വിഷയത്തിലും താന്‍ അതിജീവിതകള്‍ക്കൊപ്പമാണ് ഉറച്ചുനില്‍ക്കുന്നതെന്നും, മാധ്യമങ്ങളില്‍ കാര്യങ്ങള്‍ തുറന്നുപറഞ്ഞ സ്ത്രീകള്‍ക്ക് നേരെയുള്ള സൈബര്‍ ആക്രമണങ്ങള്‍ അംഗീകരിക്കാനാവില്ലെന്നും അവര്‍ ഫേസ്ബുക്ക് പോസ്റ്റില്‍ വ്യക്തമാക്കി.

വിഷയം ഉയര്‍ന്നുവന്നപ്പോള്‍ തന്നെ, എത്ര വലിയ നേതാവായാലും സംരക്ഷിക്കില്ലെന്ന പ്രതിപക്ഷ നേതാവ് വി.ഡി. സതീശന്റെ പ്രസ്താവനയും രാഹുല്‍ മാങ്കൂട്ടത്തിലിന്റെ രാജിയും കോണ്‍ഗ്രസ് സ്വീകരിച്ച ധീരമായ നിലപാടാണ് കാണിക്കുന്നത്. സ്ത്രീപീഡന വിഷയങ്ങളില്‍ എല്ലാ രാഷ്ട്രീയ പാര്‍ട്ടികളും ഇത്തരം നിലപാട് സ്വീകരിക്കാറുണ്ടോ എന്ന് സ്വയം പരിശോധിക്കുന്നത് നന്നായിരിക്കുമെന്നും കെ.കെ. രമ വിമര്‍ശിച്ചു.

തങ്ങള്‍ നേരിട്ട ദുരനുഭവങ്ങളുമായി നിയമപോരാട്ടത്തിന് ഇറങ്ങുന്ന അതിജീവിതമാര്‍ക്ക് സമൂഹം ഇപ്പോഴും പൂര്‍ണ്ണ പിന്തുണ നല്‍കുന്നില്ലെന്നും അവര്‍ കുറ്റപ്പെടുത്തി. വളയാര്‍ കേസില്‍ പെണ്‍കുട്ടികളുടെ അമ്മയെ ഒറ്റപ്പെടുത്തി സ്റ്റേറ്റിനെയും പോലീസിനെയും ന്യായീകരിക്കാന്‍ ആയിരക്കണക്കിന് സൈബര്‍ ഹാന്‍ഡിലുകള്‍ പ്രവര്‍ത്തിച്ചതും, സിനിമാരംഗത്തെ അതിജീവിതയ്ക്കും ഒപ്പം നിന്നവര്‍ക്കും നേരിടേണ്ടി വന്ന ഒറ്റപ്പെടുത്തലുകളും അവര്‍ ഉദാഹരണമായി ചൂണ്ടിക്കാട്ടി. ഈ കേസുകളില്‍ നീതിക്കായി ഒപ്പം നിന്നവരെ ഇപ്പോഴും സമൂഹം അപഹസിക്കുകയാണെന്നും അവര്‍ പറഞ്ഞു.

എത്ര ഒറ്റപ്പെടുത്തലുകള്‍ ഉണ്ടായാലും ദുരനുഭവങ്ങള്‍ നേരിടുന്ന സ്ത്രീകള്‍ നിയമപോരാട്ടത്തിന് സന്നദ്ധരായി മുന്നോട്ട് വരണമെന്ന് കെ.കെ. രമ അഭ്യര്‍ത്ഥിച്ചു. അങ്ങനെ മുന്നോട്ട് വരുന്നവര്‍ക്കിടയില്‍ ഐക്യം വളര്‍ത്തിയെടുക്കേണ്ടത് ജനാധിപത്യവാദികളുടെ പൊതുവായ ഉത്തരവാദിത്തമാണെന്നും അവര്‍ ഫേസ്ബുക്ക് കുറിപ്പില്‍ കൂട്ടിച്ചേര്‍ത്തു.

കെകെ രമയുടെ ഫെയ്‌സ്ബുക്ക് പോസറ്റ് വായിക്കാം