ആദ്യ അടിയന്തര പ്രമേയം വിലക്കയറ്റത്തെ കുറിച്ച്, തള്ളി സ്പീക്കർ, ഒന്നാം ദിവസം തന്നെ വാക് ഔട്ട് നടത്തി പ്രതിപക്ഷം, ധവളപത്രം എന്ന ഉമ്മാക്കി കാണിച്ച് പേടിപ്പിക്കേണ്ടെന്ന് പിണറായി

സംസ്ഥാനത്തെ രൂക്ഷമായ വിലക്കയറ്റവും ഇന്ധനവില വർദ്ധനവും മുൻനിർത്തി പ്രതിപക്ഷം കൊണ്ടുവന്ന ആദ്യ അടിയന്തരപ്രമേയ നോട്ടീസിനെച്ചൊല്ലി നിയമസഭയില്‍ ഭരണ-പ്രതിപക്ഷ കക്ഷികൾക്കിടയിൽ കടുത്ത വാദപ്രതിവാദവും രാഷ്ട്രീയ പോരും. എൽ.ഡി.എഫ്. മുന്നണിയിൽ നിന്ന് മുൻ ധനകാര്യമന്ത്രി കൂടിയായ കെ.എൻ. ബാലഗോപാലാണ് വിപണിയിലെ വിലക്കയറ്റം സഭ നിർത്തിവെച്ച് ചർച്ച ചെയ്യണമെന്ന് ആവശ്യപ്പെട്ട് അടിയന്തരപ്രമേയത്തിന് നോട്ടീസ് നൽകിയത്. എന്നാൽ വിഷയത്തിൽ മുഖ്യമന്ത്രി വി.ഡി. സതീശൻ നൽകിയ വിശദീകരണത്തെ തുടർന്ന് സ്പീക്കർ നോട്ടീസ് തള്ളി. ഇതോടെ എൽ.ഡി.എഫ്. സഭ ബഹിഷ്കരിച്ചു.

സംസ്ഥാനത്തെ വിപണി നിലവാരം മാർച്ച് 31-ന് ഉണ്ടായിരുന്നതിനേക്കാൾ ഭീമാകാരമായ രീതിയിലാണ് കുതിച്ചുയരുന്നതെന്ന് അടിയന്തരപ്രമേയം ഉന്നയിച്ചുകൊണ്ട് കെ.എൻ. ബാലഗോപാൽ കുറ്റപ്പെടുത്തി. വാണിജ്യ സിലിണ്ടറിന്റെ വില 1883 രൂപയിൽ നിന്നും ഒറ്റയടിക്ക് 3133 രൂപയായി ഉയർന്നത് ഹോട്ടൽ, നിർമ്മാണ മേഖലകളെ കടുത്ത പ്രതിസന്ധിയിലാക്കിയെന്നും പെട്രോൾ, ഡീസൽ വിലയും കുത്തനെ കൂടിയെന്നും അദ്ദേഹം ചൂണ്ടിക്കാട്ടി. മുൻപ് ഇടതുപക്ഷ സർക്കാരിന്റെ കാലത്ത് ഇന്ധനവില ഉയർന്നപ്പോൾ അധിക നികുതി കുറയ്ക്കണമെന്ന് ആവശ്യപ്പെട്ട് സമരം ചെയ്ത വി.ഡി. സതീശൻ ഇന്ന് മുഖ്യമന്ത്രി പദവിയിൽ ഇരിക്കുമ്പോൾ ആ വാക്ക് പാലിക്കാത്തത് ജനങ്ങളോടുള്ള വെല്ലുവിളിയാണെന്ന് ബാലഗോപാൽ ആരോപിച്ചു.

എന്നാൽ പ്രതിപക്ഷത്തിന്റെ ആക്ഷേപങ്ങൾക്ക് മുൻ ഇടതു സർക്കാരിന്റെ കണക്കുകൾ നിരത്തിയാണ് മുഖ്യമന്ത്രി വി.ഡി. സതീശൻ മറുപടി നൽകിയത്. പശ്ചിമേഷ്യയിലെ യുദ്ധസമാനമായ അന്തരീക്ഷവും അന്താരാഷ്ട്ര അനിശ്ചിതത്വങ്ങളുമാണ് നിലവിലെ വിലക്കയറ്റത്തിന് കാരണമെന്ന് മുഖ്യമന്ത്രി ചൂണ്ടിക്കാട്ടി. മുൻപ് 2016 മുതൽ 2025 ജനുവരി വരെ ഇന്ധനവില വർദ്ധനവിലൂടെ ഇടതു സർക്കാരിന് 3100 കോടി രൂപയുടെ അധിക വരുമാനമുണ്ടായിട്ടും നികുതി കുറയ്ക്കാൻ തയ്യാറായില്ലെന്നും, അന്ന് നികുതി കുറയ്ക്കുന്നത് ‘മണ്ടത്തരമാണെന്ന്’ പറഞ്ഞ മുൻ ധനമന്ത്രി തോമസ് ഐസകിന്റെ നിലപാട് സഭാ രേഖകളിലുണ്ടെന്നും മുഖ്യമന്ത്രി തിരിച്ചടിച്ചു.

വിപണിയിൽ ഇടപെടേണ്ട സിവിൽ സപ്ലൈസ് കോർപ്പറേഷനെ (സപ്ലൈകോ) 2893 കോടിയോളം രൂപയുടെ ഭീമമായ കടത്തിലാക്കിയാണ് കഴിഞ്ഞ ഇടതു സർക്കാർ പോയതെന്നും, ആ കടബാധ്യതകൾ തീർത്താൽ മാത്രമേ പുതിയ സർക്കാരിന് കാര്യക്ഷമമായി ഇടപെടാൻ സാധിക്കൂ എന്നും മുഖ്യമന്ത്രി വ്യക്തമാക്കി. വരും ദിവസങ്ങളിൽ സംസ്ഥാനത്തിന്റെ യഥാർത്ഥ ധനസ്ഥിതി വ്യക്തമാക്കിക്കൊണ്ട് സഭയിൽ ‘വിസ്മയിപ്പിക്കുന്ന ധവളപത്രം’ പുറത്തിറക്കുമെന്നും മുഖ്യമന്ത്രി പ്രഖ്യാപിച്ചു. ധവളപത്ര ഭീഷണി തങ്ങൾക്ക് വേണ്ടെന്ന് വ്യക്തമാക്കിക്കൊണ്ടാണ് പ്രതിപക്ഷ നേതാവ് പിണറായി വിജയന്റെ നേതൃത്വത്തിൽ എൽ.ഡി.എഫ്. സഭയിൽ നിന്നും ഇറങ്ങിപ്പോയത്.