നീതി തേടി ഹർഷിന വീണ്ടും സമരത്തിലേക്ക്, ആരോഗ്യ മന്ത്രിയുടെ വീടിന് മുന്നില്‍ ഏകദിന സത്യാഗ്രഹം

കോഴിക്കോട് മെഡിക്കൽ കോളജിലെ പ്രസവ ശസ്ത്രക്രിയയ്ക്കിടെ വയറ്റിൽ കത്രിക കുടുങ്ങിയ സംഭവത്തിൽ നീതി തേടി ഹർഷിന വീണ്ടും സമരരംഗത്തേക്ക്. സർക്കാർ നൽകിയ വാഗ്ദാനങ്ങൾ പാലിക്കപ്പെട്ടില്ലെന്ന് ആരോപിച്ച് ആരോഗ്യ മന്ത്രി വീണാ ജോർജിന്റെ തിരുവനന്തപുരത്തെ ഔദ്യോഗിക വസതിക്ക് മുന്നില്‍ ഹർഷിന ഏകദിന സത്യാഗ്രഹം ഇരുന്നു. ശസ്ത്രക്രിയയ്ക്കിടെ വയറ്റിൽ കത്രിക കുടുങ്ങി അഞ്ച് വർഷത്തോളം കടുത്ത ദുരിതമനുഭവിച്ച തനിക്ക് നൽകിയ ഉറപ്പുകൾ വെറും വാക്കായി മാറിയെന്ന് ഹർഷിന കുറ്റപ്പെടുത്തി.

നഷ്ടപരിഹാരം നൽകുമെന്നും കുറ്റക്കാർക്കെതിരെ നടപടിയെടുക്കുമെന്നും അധികൃതർ അറിയിച്ചിരുന്നെങ്കിലും നാലര വർഷം പിന്നിട്ടിട്ടും നീതി ലഭിച്ചില്ലെന്ന് ഹർഷിന പറയുന്നു. മുമ്പ് സമരപ്പന്തലിലെത്തിയ ആരോഗ്യ മന്ത്രി തന്നെ കെട്ടിപ്പിടിക്കുകയും ഒപ്പമുണ്ടാകുമെന്ന് ഉറപ്പുനൽകുകയും ചെയ്തിരുന്നുവെങ്കിലും ആ കെട്ടിപ്പിടുത്തത്തിൽ നീതിയുണ്ടായിരുന്നില്ലെന്ന് ഹർഷിന പരിതപിച്ചു. 24 മണിക്കൂറും കൂടെയുണ്ടാകുമെന്ന മന്ത്രിയുടെ വാഗ്ദാനം പാഴ്‌വാക്കായി മാറിയെന്നും അവർ പറഞ്ഞു.

നിലവിൽ കടുത്ത സാമ്പത്തിക പ്രതിസന്ധിയിലാണ് തന്റെ കുടുംബമെന്നും ഹർഷിന വെളിപ്പെടുത്തി. മുൻപ് പ്രതിപക്ഷ നേതാവ് നൽകിയ ഒരു ലക്ഷം രൂപ ഉപയോഗിച്ചാണ് തുടർചികിത്സകൾ നടത്തിയത്. ആ പണം ഇപ്പോൾ പൂർണ്ണമായും തീർന്നെന്നും മുന്നോട്ടുള്ള ജീവിതത്തിനും ചികിത്സയ്ക്കും മറ്റ് വഴികളില്ലാത്ത അവസ്ഥയിലാണെന്നും അവർ സങ്കടത്തോടെ ചൂണ്ടിക്കാട്ടി. ശാരീരിക അവശതകൾക്കിടയിലും വീണ്ടും തെരുവിലേക്ക് ഇറങ്ങേണ്ടി വന്നത് നീതി നിഷേധിക്കപ്പെട്ടത് കൊണ്ടാണെന്നും അവർ കൂട്ടിച്ചേർത്തു.

കോൺഗ്രസ് നേതാവ് രമേശ് ചെന്നിത്തലയാണ് ഹർഷിനയുടെ പുതിയ സമരം ഉദ്ഘാടനം ചെയ്തത്. ഹർഷിനയ്ക്ക് അർഹമായ നീതിയും നഷ്ടപരിഹാരവും ലഭിക്കുന്നത് വരെ പോരാട്ടം തുടരുമെന്ന് സമരസമിതിയും വ്യക്തമാക്കിയിട്ടുണ്ട്. അഞ്ച് വർഷം ശാരീരികമായും മാനസികമായും തളർന്ന ഒരു സ്ത്രീയുടെ വിലാപം സർക്കാർ ഗൗരവമായി കാണണമെന്ന ആവശ്യം ഇതോടെ വീണ്ടും ശക്തമാവുകയാണ്.