സി.പി.എം സൈബർ ടീമിൽ പൊട്ടിത്തെറി; നികേഷിന്റെ ഏകാധിപത്യത്തില്‍ പ്രതിഷേധിച്ച് 3 മുതിർന്ന മാധ്യമപ്രവർത്തകർ ടീം വിട്ടു

സി.പി.എം സോഷ്യൽ മീഡിയ ടീമിനുള്ളിൽ ആഭ്യന്തര കലഹം രൂക്ഷമാകുന്നു. എ.കെ.ജി സെന്റർ കേന്ദ്രീകരിച്ച് പ്രവർത്തിക്കുന്ന സൈബർ ടീമിന്റെ ചുമതലയുള്ള എം.വി. നികേഷ് കുമാറിന്റെ ഏകപക്ഷീയമായ തീരുമാനങ്ങളിലും പ്രവർത്തന രീതികളിലും പ്രതിഷേധിച്ച് മൂന്ന് മുതിർന്ന മാധ്യമപ്രവർത്തകർ ടീമിൽ നിന്നും രാജിവെച്ചു. ദേശാഭിമാനി മുൻ ന്യൂസ് എഡിറ്റർമാരായ കെ.വി. സുധാകരൻ, കെ. മോഹൻദാസ്, ഇ.എസ്. സുഭാഷ് എന്നിവരാണ് ചുമതലകൾ ഒഴിഞ്ഞത്.

നിയമസഭാ തിരഞ്ഞെടുപ്പ് ലക്ഷ്യമിട്ട് യു.ഡി.എഫിനെതിരായ പ്രചാരണം ശക്തമാക്കാനാണ് ഈ പ്രത്യേക സൈബർ സംഘത്തെ പാർട്ടി സജ്ജമാക്കിയത്. ഇതിന്റെ ഭാഗമായി പുതിയ വെബ്സൈറ്റും ‘മകനേ മടങ്ങിവരല്ലേ’ തുടങ്ങിയ ക്യാമ്പയിനുകളും ആരംഭിച്ചിരുന്നു. എന്നാൽ, ടീം രൂപീകരിച്ച് ചുരുങ്ങിയ കാലയളവിനുള്ളിൽ തന്നെ നേതൃത്വവുമായി ഭിന്നത രൂക്ഷമായത് പാർട്ടിയെ പ്രതിരോധത്തിലാക്കിയിരിക്കുകയാണ്.

നികേഷ് കുമാറിന്റെ ഏകപക്ഷീയമായ നടപടികളാണ് മുതിർന്ന മാധ്യമപ്രവർത്തകരുടെ രാജിക്ക് പ്രധാന കാരണമായി ചൂണ്ടിക്കാണിക്കപ്പെടുന്നത്. സംഘത്തിലുള്ളവർക്ക് അർഹമായ പരിഗണന ലഭിക്കുന്നില്ലെന്ന പരാതിയും ഇവർക്കുണ്ട്. സി.പി.എം സംസ്ഥാന സെക്രട്ടറി എം.വി. ഗോവിന്ദന്റെ പ്രത്യേക താല്പര്യപ്രകാരമാണ് നികേഷ് ഈ ചുമതലയിൽ എത്തിയതെങ്കിലും, പാർട്ടിക്കുള്ളിലെ മുതിർന്ന നേതാക്കൾക്കിടയിൽ പോലും ഇതിനെതിരെ അമർഷമുണ്ടെന്നാണ് റിപ്പോർട്ടുകൾ.

സോഷ്യൽ മീഡിയയിലെ പാർട്ടിയുടെ ഇടപെടലുകൾ പ്രതീക്ഷിച്ചത്ര ഫലപ്രദമാകുന്നില്ലെന്ന വിമർശനം ഇടതു കേന്ദ്രങ്ങളിൽ നിന്ന് തന്നെ ഉയരുന്നുണ്ട്. പി.ആർ. തന്ത്രങ്ങൾ പലപ്പോഴും പാളിപ്പോകുന്നതായും മുഖ്യമന്ത്രി പിണറായി വിജയൻ തന്നെ നിലവിലെ സോഷ്യൽ മീഡിയ പ്രവർത്തനങ്ങളിൽ അതൃപ്തി രേഖപ്പെടുത്തിയതായും വിവരമുണ്ട്. മൂന്ന് മേഖലകളിലായി നടക്കുന്ന ജാഥകളുടെ സമയത്തുണ്ടായ ഇത്തരം പാളിച്ചകൾ ടീമിനുള്ളിലെ ഭിന്നത വർധിപ്പിച്ചു.

തിരഞ്ഞെടുപ്പ് പ്രചാരണ വേദിയിൽ സൈബർ പോരാട്ടങ്ങൾക്കായി സജ്ജീകരിച്ചിട്ടുള്ള ഈ ടീമിലെ പൊട്ടിത്തെറി സി.പി.എമ്മിന് വലിയ തിരിച്ചടിയാണ്. രാജിവെച്ചവരുമായി സംസാരിക്കാൻ നികേഷ് കുമാറിന് ഇതുവരെ സാധിച്ചിട്ടില്ലെന്നും ഇവർ തിരികെ വരാനുള്ള സാധ്യതകൾ മങ്ങുകയാണെന്നും റിപ്പോർട്ടുകൾ വ്യക്തമാക്കുന്നു. പാർട്ടിയുടെ ഔദ്യോഗിക പ്രതികരണം ഈ വിഷയത്തിൽ ഇതുവരെ ലഭ്യമായിട്ടില്ല.