‘ഉദ്യോഗസ്ഥർ മന്ത്രിക്ക് എസ്‌കോർട്ട് പോകണം’; വകുപ്പ് മന്ത്രി അറിയാതെ വിചിത്ര പരിഷ്‌കാരവുമായി എം ആർ അജിത് കുമാർ

കേരള എക്‌സൈസ് വകുപ്പിൽ ഉദ്യോഗസ്ഥരെ ഞെട്ടിച്ചുകൊണ്ട് എക്‌സൈസ് കമ്മീഷണർ എം.ആർ. അജിത് കുമാർ പുറപ്പെടുവിച്ച വിചിത്രമായ ഉത്തരവ് വിവാദമാകുന്നു. എക്‌സൈസ് മന്ത്രി പങ്കെടുക്കുന്ന പരിപാടികളിൽ അതത് ജില്ലകളിലെ ഉദ്യോഗസ്ഥർ നിർബന്ധമായും മന്ത്രിക്ക് എസ്‌കോർട്ട് പോകണമെന്നാണ് കമ്മീഷണറുടെ പുതിയ നിർദ്ദേശം. എന്നാൽ, വകുപ്പ് ഭരിക്കുന്ന മന്ത്രി എം.ബി. രാജേഷ് പോലുമറിയാതെയാണ് കമ്മീഷണർ ഇത്തരമൊരു പരിഷ്‌കാരം നടപ്പിലാക്കാൻ തുനിഞ്ഞതെന്നതാണ് ശ്രദ്ധേയം.

കഴിഞ്ഞ ദിവസം നടന്ന ഡെപ്യൂട്ടി കമ്മീഷണർമാരുടെയും ജോയിന്റ് കമ്മീഷണർമാരുടെയും യോഗത്തിലാണ് അജിത് കുമാർ ഈ നിർദ്ദേശം മുന്നോട്ടുവെച്ചത്. നിലവിൽ ആവശ്യത്തിന് ഉദ്യോഗസ്ഥരോ വാഹനങ്ങളോ ഇല്ലാതെ എക്‌സൈസ് വകുപ്പ് വലിയ പ്രതിസന്ധി നേരിടുന്ന സാഹചര്യത്തിലാണ് കമ്മീഷണറുടെ ഈ നടപടി. മന്ത്രിക്ക് എസ്‌കോർട്ട് നൽകുന്നതിനായി ഉദ്യോഗസ്ഥരെ നിയോഗിക്കുമ്പോൾ അത് വകുപ്പിന്റെ ദൈനംദിന പ്രവർത്തനങ്ങളെ ബാധിക്കുമെന്ന ആശങ്കയും ഉയരുന്നുണ്ട്.

മന്ത്രിക്ക് എസ്‌കോർട്ട് നൽകുന്ന ദിവസങ്ങളിൽ എൻഫോഴ്‌സ്‌മെന്റ് നടപടികൾ അതായത് പരിശോധനകളും റെയ്ഡുകളും വേണ്ടെന്നുപോലും കമ്മീഷണർ നിർദ്ദേശിച്ചതായി യോഗത്തിന്റെ മിനുറ്റ്‌സ് വ്യക്തമാക്കുന്നു. ലഹരി വിരുദ്ധ പ്രവർത്തനങ്ങൾ ശക്തമാക്കേണ്ട ഒരു വകുപ്പിൽ, മന്ത്രിയുടെ സുരക്ഷയ്ക്കും അകമ്പടിക്കും വേണ്ടി എൻഫോഴ്‌സ്‌മെന്റ് പ്രവർത്തനങ്ങൾ നിർത്തിവെക്കണമെന്ന നിർദ്ദേശം ഉദ്യോഗസ്ഥർക്കിടയിൽ വലിയ പ്രതിഷേധത്തിന് കാരണമായിട്ടുണ്ട്.

സംഭവം വാർത്തയായതോടെ മന്ത്രി എം.ബി. രാജേഷ് കടുത്ത അതൃപ്തി രേഖപ്പെടുത്തിയതായാണ് വിവരം. മന്ത്രിയുടെ ഓഫീസ് നേരിട്ട് കമ്മീഷണറെ ബന്ധപ്പെട്ട് വിശദീകരണം തേടി. എന്നാൽ, മന്ത്രി ജില്ലകളിൽ എത്തുമ്പോൾ കാര്യങ്ങൾ വിശദീകരിക്കേണ്ട (ബ്രീഫിംഗ്) ഉത്തരവാദിത്തമുള്ള ഡെപ്യൂട്ടി കമ്മീഷണർമാരുടെ ഭാഗത്തുനിന്ന് സമീപകാലത്ത് ചില വീഴ്ചകൾ സംഭവിച്ചിട്ടുണ്ടെന്നും അത് പരിഹരിക്കാനാണ് നിർദ്ദേശം നൽകിയതെന്നുമാണ് അജിത് കുമാർ നൽകുന്ന വിശദീകരണം.

എക്‌സൈസ് വകുപ്പിലെ ഉദ്യോഗസ്ഥ ക്ഷാമവും വാഹനങ്ങളുടെ കുറവും പരിഹരിക്കാൻ നടപടിയില്ലാതെ, ഇത്തരം പ്രഹസനപരമായ പരിഷ്‌കാരങ്ങൾ നടപ്പിലാക്കുന്നത് വകുപ്പിന്റെ അന്തസത്തയ്ക്ക് നിരക്കാത്തതാണെന്ന വിമർശനം ശക്തമാണ്. ക്രമസമാധാന ചുമതലയുള്ള എ.ഡി.ജി.പി സ്ഥാനത്തുനിന്നും നേരത്തെ മാറ്റപ്പെട്ട അജിത് കുമാർ, എക്‌സൈസ് കമ്മീഷണർ എന്ന നിലയിൽ സ്വീകരിക്കുന്ന ഈ പുതിയ നീക്കം വരും ദിവസങ്ങളിൽ കൂടുതൽ രാഷ്ട്രീയ വിവാദങ്ങൾക്ക് വഴിവെച്ചേക്കാം.