‘പ്രൊഫ്കോണുമായി’ ഞങ്ങള്‍ക്ക് ബന്ധമില്ല: കുസാറ്റ് അധികൃതർ

കൊച്ചി: മംഗളൂരുവിൽ നടക്കാനിരിക്കുന്ന ‘വിസ്ഡം’ കോൺഫറൻസുമായി ബന്ധപ്പെട്ട ‘പ്രൊഫ്കോൺ’ എന്ന പരിപാടിയിൽ തങ്ങൾക്ക് യാതൊരു പങ്കുമില്ലെന്ന് കൊച്ചിൻ യൂണിവേഴ്സിറ്റി ഓഫ് സയൻസ് ആൻഡ് ടെക്നോളജി (കുസാറ്റ്) അറിയിച്ചു. സെപ്റ്റംബർ 15-ന് സർവകലാശാല വിദ്യാർത്ഥികൾക്കായി ഇത്തരമൊരു സമ്മേളനം നടത്തിയെന്ന തരത്തിൽ പ്രചരിച്ച വീഡിയോയെ തുടർന്നാണ് വിശദീകരണം.

ഈ വിവരങ്ങൾ അടിസ്ഥാനരഹിതവും തെറ്റാണെന്നും സർവകലാശാല പുറത്തിറക്കിയ പ്രസ്താവനയിൽ പറയുന്നു. ‘പ്രൊഫ്കോൺ’ എന്ന പേരിൽ കുസാറ്റോ അതുമായി ബന്ധപ്പെട്ട ആരും പരിപാടി സംഘടിപ്പിച്ചിട്ടില്ല. ലിംഗവിവേചനം പ്രോത്സാഹിപ്പിക്കുന്ന യാതൊരു പരിപാടിക്കും സർവകലാശാല പിന്തുണ നൽകുകയോ സംഘടിപ്പിക്കുകയോ ചെയ്യില്ല. സർവകലാശാലയുടെ ഭാഗത്തുനിന്ന് ഇത്തരം പരിപാടികൾക്ക് അംഗീകാരം നൽകിയിട്ടില്ലെന്നും അധികൃതർ വ്യക്തമാക്കി.

മംഗളൂരുവിലെ വിസ്ഡം കോൺഫറൻസിന്റെ ഭാഗമായി ‘പ്രൊഫ്കോൺ’ എന്ന പേരിൽ കുസാറ്റ് ഒരു പരിപാടിയും നടത്തിയിട്ടില്ല. ഇത്തരത്തിലുള്ള വ്യാജ വാർത്തകൾ പ്രചരിപ്പിക്കരുതെന്നും വസ്തുതകൾ ഉറപ്പുവരുത്തിയ ശേഷം മാത്രം വാർത്തകൾ പ്രസിദ്ധീകരിക്കാനും പങ്കുവെക്കാനും മാധ്യമങ്ങളോടും വിദ്യാർത്ഥികളോടും സർവകലാശാല ആവശ്യപ്പെട്ടു.