സുരേഷ് ബാബുവിന്റെ രാജി അധമന് രക്ഷപ്പെടാനുള്ള വഴി; അയാള്‍ ലൈംഗിക മനോരോഗികളുടെ വി.സിയാണെന്ന് സ്വന്തം പാർട്ടിക്കാർ തന്നെ പറയുന്നു: ഡോ. ജിന്റോ ജോൺ

സി.പി.എം പാലക്കാട് ജില്ലാ സെക്രട്ടറി സ്ഥാനത്തുനിന്നുള്ള ഇ.എൻ. സുരേഷ് ബാബുവിന്റെ രാജി തെറ്റ് തിരുത്തലല്ലെന്നും, ഒരധമന് രക്ഷപ്പെടാൻ പാർട്ടി നൽകിയ അവസരമാണെന്നും കോൺഗ്രസ് നേതാവ് ഡോ. ജിന്റോ ജോൺ . പാർട്ടി പ്രവർത്തകർക്കിടയിലെ അടക്കംപറച്ചിലുകൾ ശരിയാണെങ്കിൽ, സുരേഷ് ബാബുവിനെതിരെയുള്ള സ്ത്രീകളുടെ പരാതികൾ പോലീസിന് കൈമാറാൻ സി.പി.എം തയ്യാറാകണമെന്ന് അദ്ദേഹം ഫേസ്ബുക്ക് കുറിപ്പിലൂടെ ആവശ്യപ്പെട്ടു.

എത്ര തെറ്റ് തിരുത്തൽ സമ്മേളനം നടത്തിയാലും ഇത്തരം ഗുരുതരമായ തെറ്റുകൾ എന്തുകൊണ്ടാണ് പാർട്ടിക്ക് മനസ്സിലാകാത്തതെന്ന് അദ്ദേഹം ചോദിച്ചു. പാർട്ടിക്ക് സ്വന്തമായി കോടതിയും പോലീസ് സ്റ്റേഷനും ഉണ്ടെന്ന് വീമ്പിളക്കാമെങ്കിലും, രാജ്യത്തെ നിയമ നീതി സംവിധാനങ്ങളെക്കൂടി ബഹുമാനിക്കാൻ സി.പി.എം തയ്യാറാകണമെന്നും ജിന്റോ ജോൺ ചൂണ്ടിക്കാട്ടി.

വ്യാജ അപഖ്യാതികൾ നിർമ്മിച്ച് ആസ്വദിച്ച സുരേഷ് ബാബു ലൈംഗിക മനോരോഗികളുടെ ‘വൈസ് ചാൻസലർ’ ആയിരുന്നു എന്നാണ് പാലക്കാട്ടെ സി.പി.എം പ്രവർത്തകർ തന്നെ പറയുന്നതെന്ന് അദ്ദേഹം പരിഹസിച്ചു. വ്യക്തിപരമായ കാരണങ്ങളാൽ രാജിവെച്ചു എന്നതിനേക്കാൾ, നിലവിലുള്ള നിരവധി പരാതികൾ പറഞ്ഞുതീർക്കാൻ സാധിക്കാത്തതുകൊണ്ടാണ് അദ്ദേഹം ഒഴിഞ്ഞതെന്നാണ് വ്യക്തമാകുന്നതെന്നും അദ്ദേഹം കൂട്ടിച്ചേർത്തു.

വിശാല ജില്ലാ സമ്മേളനം വിളിച്ചുചേർത്ത ആൾ തന്നെ പെട്ടെന്ന് സ്ഥാനമൊഴിയുന്ന സാഹചര്യത്തിന്റെ യഥാർത്ഥ കാരണം വ്യക്തമാക്കപ്പെടേണ്ടതുണ്ടെന്ന് കുറിപ്പിൽ പറയുന്നു. പലവിധ ആരോപണങ്ങളുടെ പേരിൽ പാർട്ടി ശ്രേണിയിൽ വളർന്നുവന്ന ഒരാൾ, ഒടുവിൽ ആരോപണങ്ങളെത്തുടർന്ന് പുറത്തുപോയപ്പോൾ അതിൽ കൃത്യമായ ഉത്തരം നൽകാൻ പാർട്ടി നേതൃത്വത്തിന് ഉത്തരവാദിത്തമുണ്ടെന്നും ഡോ. ജിന്റോ ജോൺ വ്യക്തമാക്കി.