ബഹാഉദ്ദീൻ നദ്‌വിക്ക് എതിരായ പരാമർശം: സിപിഎം നേതാവിനെ മഹല്ല് കമ്മിറ്റിയിൽ നിന്ന് പുറത്താക്കി

കോഴിക്കോട്: സമസ്ത മുശാവറാംഗം ഡോ. ബഹാഉദ്ദീൻ മുഹമ്മദ് നദ്‌വിക്കെതിരെ അധിക്ഷേപപരമായ പരാമർശം നടത്തിയ സിപിഎം നേതാവ് ഹഖീൽ അഹമ്മദിനെ മഹല്ല് കമ്മിറ്റിയിൽ നിന്ന് പുറത്താക്കി.

സിപിഎം ലോക്കൽ കമ്മിറ്റി അംഗമായ ഹഖീൽ, മടവൂർ മഹല്ല് കമ്മിറ്റിയുടെ ട്രഷറർ സ്ഥാനമാണ് വഹിച്ചിരുന്നത്. മടവൂർ സി.എം മഖാം മഹല്ല് കമ്മിറ്റിയാണ് അദ്ദേഹത്തിനെതിരെ നടപടിയെടുത്തത്.

മടവൂരിൽ സുന്നി മഹല്ല് ഫെഡറേഷൻ സംഘടിപ്പിച്ച ഒരു പരിപാടിയിൽ ബഹാഉദ്ദീൻ നദ്‌വിയുടെ പ്രസംഗം വിവാദമായിരുന്നു. ഇതിനെതിരെ സിപിഎം സംഘടിപ്പിച്ച പ്രതിഷേധ പരിപാടിയിലാണ് ഹഖീൽ നദ്‌വിക്കെതിരെ മോശം പരാമർശം നടത്തിയത്.

“പണ്ഡിത വേഷം ധരിച്ച നാറി” എന്നാണ് ഹഖീൽ അഹമ്മദ് നദ്‌വിയെ വിശേഷിപ്പിച്ചത്. ഇതേത്തുടർന്നാണ് മഹല്ല് കമ്മിറ്റി അദ്ദേഹത്തെ ഭാരവാഹിത്വത്തിൽ നിന്ന് പുറത്താക്കാൻ തീരുമാനിച്ചത്.