മുഖ്യധാരാ മാധ്യമങ്ങള്‍ അവഗണിയ്ക്കുന്നു, ‘കനല്‍’ യൂട്യൂബ് ചാനലുമായി സിപിഐ

തിരുവനന്തപുരം: മുഖ്യധാരാ മാധ്യമങ്ങളില്‍ അര്‍ഹമായ പ്രാതിനിധ്യം ലഭിക്കുന്നില്ലെന്ന വിലയിരുത്തലിനെ തുടര്‍ന്ന് ‘കനല്‍’ എന്ന പേരില്‍ യൂട്യൂബ് ചാനലുമായി സിപിഐ രംഗത്ത്. പാര്‍ട്ടിയുടെ രാഷ്ട്രീയ നിലപാടുകളും ആശയങ്ങളും ജനങ്ങളിലേക്ക് നേരിട്ടെത്തിക്കുക എന്നതാണ് ഈ നീക്കത്തിലൂടെ സിപിഐ ലക്ഷ്യമിടുന്നത്.

മുതിര്‍ന്ന മാധ്യമപ്രവര്‍ത്തകരുടെ നേതൃത്വത്തിലുള്ള ഒരു സംഘമായിരിക്കും ചാനലിന്റെ പ്രവര്‍ത്തനങ്ങള്‍ നിയന്ത്രിക്കുക.

നേരത്തെ ഒരു ചാനല്‍ തുടങ്ങാന്‍ സിപിഐ ആലോചിച്ചിരുന്നെങ്കിലും സാങ്കേതികമായ കാരണങ്ങള്‍ മുന്‍നിര്‍ത്തി ഈ നീക്കത്തില്‍ നിന്ന് പിന്‍വാങ്ങുകയായിരുന്നു. ‘കനല്‍’ എന്ന യൂട്യൂബ് ചാനല്‍ ആരംഭിക്കുന്നതോടെ പാര്‍ട്ടിയുടെ പരിപാടികള്‍ക്കും നേതാക്കള്‍ക്കും കൂടുതല്‍ ഇടം ലഭിക്കുമെന്നാണ് വിലയിരുത്തപ്പെടുന്നത്.

ഈ യൂട്യൂബ് ചാനല്‍ തുടങ്ങുന്നതുമായി ബന്ധപ്പെട്ട് സിപിഐ സംസ്ഥാന സമ്മേളനത്തില്‍ പ്രഖ്യാപനം ഉണ്ടാകുമെന്നും പ്രതീക്ഷിച്ചിരുന്നു. എന്നാല്‍ ഇതുവരെയും അത്തരമൊരു തീരുമാനം ഉണ്ടായിട്ടില്ലെന്നാണ് ലഭിക്കുന്ന വിവരം.