വർഗീയ പരാമർശം: ബിജെപി സ്ഥാനാർത്ഥി ബി. ഗോപാലകൃഷ്ണനെതിരെ കേസെടുത്തു

നിയമസഭാ തിരഞ്ഞെടുപ്പിനോടനുബന്ധിച്ചുള്ള മാതൃകാ പെരുമാറ്റച്ചട്ടം ലംഘിച്ചതിന് ബിജെപി സംസ്ഥാന വൈസ് പ്രസിഡന്റും ഗുരുവായൂർ മണ്ഡലം സ്ഥാനാർത്ഥിയുമായ അഡ്വ. ബി. ഗോപാലകൃഷ്ണനെതിരെ പോലീസ് കേസെടുത്തു. വിവാദ പരാമർശങ്ങൾ ഉൾപ്പെട്ട വീഡിയോ പ്രചരിപ്പിച്ചതിനെത്തുടർന്ന് ലഭിച്ച പരാതിയിലാണ് നടപടി. മുഖ്യ തിരഞ്ഞെടുപ്പ് ഓഫീസർ ഡോ. രത്തൻ യു. ഖേൽക്കറുടെ നിർദ്ദേശപ്രകാരം തൃശ്ശൂർ ജില്ലാ കളക്ടറാണ് കേസ് രജിസ്റ്റർ ചെയ്യാൻ ഉത്തരവിട്ടത്.

വോട്ട് തേടുന്നതിനായി ജാതി, മതം അല്ലെങ്കിൽ സാമുദായിക വികാരങ്ങൾ ഉപയോഗിക്കാൻ പാടില്ലെന്ന പെരുമാറ്റച്ചട്ടത്തിലെ കർശന നിർദ്ദേശം ഗോപാലകൃഷ്ണൻ ലംഘിച്ചതായി അധികൃതർ കണ്ടെത്തി. കൂടാതെ, ആരാധനാലയങ്ങൾ തിരഞ്ഞെടുപ്പ് പ്രചാരണ വേദിയാക്കരുതെന്ന ചട്ടവും ഇദ്ദേഹം പങ്കുവെച്ച വീഡിയോയിലൂടെ ലംഘിക്കപ്പെട്ടിട്ടുണ്ട്. ജനപ്രാതിനിധ്യ നിയമത്തിലെ 123(3) വകുപ്പ് പ്രകാരമാണ് നിലവിൽ നടപടി സ്വീകരിച്ചിരിക്കുന്നത്.

ജില്ലാ കളക്ടറുടെ ഉത്തരവിനെത്തുടർന്ന് വിവാദമായ വീഡിയോ സോഷ്യൽ മീഡിയ പ്ലാറ്റ്‌ഫോമുകളിൽ നിന്ന് നീക്കം ചെയ്തു. സംഭവത്തിൽ ഗുരുവായൂർ ടെമ്പിൾ പോലീസ് സ്റ്റേഷനിൽ എഫ്ഐആർ രജിസ്റ്റർ ചെയ്തിട്ടുണ്ട്. തിരഞ്ഞെടുപ്പ് പ്രചാരണങ്ങളിൽ മതപരമായ വേർതിരിവുകൾ ഉണ്ടാക്കുന്ന തരത്തിലുള്ള പരാമർശങ്ങൾക്കെതിരെ കർശന നടപടി തുടരുമെന്ന് തിരഞ്ഞെടുപ്പ് കമ്മീഷൻ വ്യക്തമാക്കി.