ഹിറ്റ്‌ലര്‍ പരാമര്‍ശം, രോവന്ത് റെഡ്ഡിയ്ക്ക് കര്‍ശന താക്കീതുമായി ഹൈക്കമാന്‍ഡ്‌

തെലങ്കാന മുഖ്യമന്ത്രി രേവന്ത് റെഡ്ഡിയുടെ ഹിറ്റ്‌ലറെക്കുറിച്ചുള്ള പരാമർശത്തിൽ അതൃപ്തി രേഖപ്പെടുത്തി കോൺഗ്രസ് ഹൈക്കമാൻഡ് രംഗത്ത്. പാർട്ടി നയങ്ങൾക്കും പ്രത്യയശാസ്ത്രത്തിനും വിരുദ്ധമായ പ്രസ്താവനയാണ് രേവന്തിന്റെ ഭാഗത്തുനിന്നുണ്ടായതെന്ന് കോൺഗ്രസ് നേതൃത്വം വ്യക്തമാക്കി. വിഷയത്തിൽ അതൃപ്തി പ്രകടിപ്പിച്ച പാർട്ടി, ഭാവിയിൽ ഇത്തരം പരാമർശങ്ങൾ ആവർത്തിക്കരുതെന്നും അച്ചടക്കം പാലിക്കണമെന്നും അദ്ദേഹത്തിന് നിർദേശം നൽകി.

ഇക്കാര്യത്തിൽ രൂക്ഷമായ ഭാഷയിലാണ് എഐസിസി ജനറൽ സെക്രട്ടറി കെ.സി. വേണുഗോപാൽ പ്രതികരിച്ചത്. രേവന്ത് റെഡ്ഡി നടത്തിയ പ്രസ്താവന ഒട്ടും സ്വീകാര്യമായതല്ലെന്ന് അദ്ദേഹം വ്യക്തമാക്കി. പാർട്ടിയുടെ വിയോജിപ്പ് ഔദ്യോഗികമായി അദ്ദേഹത്തെ അറിയിച്ചിട്ടുണ്ടെന്നും, ഭാവിയിൽ അഭിപ്രായങ്ങൾ പ്രകടിപ്പിക്കുമ്പോൾ കൂടുതൽ ശ്രദ്ധയും അച്ചടക്കവും പുലർത്തണമെന്നും കെ.സി. വേണുഗോപാൽ കൂട്ടിച്ചേർത്തു.

തെലങ്കാനയിലെ കയ്യേറ്റ വിരുദ്ധ ദൗത്യസേനയായ ഹൈദരാബാദ് ഡിസാസ്റ്റർ റെസ്പോൺസ് ആൻഡ് അസറ്റ് പ്രൊട്ടക്‌ഷൻ ഏജൻസിക്ക് (HYDRAA) പ്രചോദനമായത് അഡോൾഫ് ഹിറ്റ്‌ലർ ആണെന്നായിരുന്നു രേവന്ത് റെഡ്ഡിയുടെ വിവാദ പരാമർശം. ഹൈഡ്ര എന്നത് ഹിറ്റ്‌ലറുടെ പ്രിയപ്പെട്ട വാക്കായിരുന്നെന്നും, അദ്ദേഹത്തിന്റെ കോർ ടീമിന് ഹൈഡ്ര എന്നായിരുന്നു പേരെന്നും മുഖ്യമന്ത്രി പറഞ്ഞിരുന്നു. ഈ താരതമ്യം രാഷ്ട്രീയ കേന്ദ്രങ്ങളിൽ വലിയ വിമർശനങ്ങൾക്ക് കാരണമായിരുന്നു.

രേവന്ത് റെഡ്ഡിയുടെ ഈ പരാമർശം രാഷ്ട്രീയമായി വലിയ വിവാദമാവുകയും പ്രതിപക്ഷം ഇതിനെതിരെ ശക്തമായി രംഗത്തുവരികയും ചെയ്തിരുന്നു. ഹിറ്റ്‌ലറുമായുള്ള ഇത്തരമൊരു താരതമ്യം കോൺഗ്രസ് പാർട്ടിയുടെ ജനാധിപത്യപരമായ പ്രതിച്ഛായയെ ബാധിക്കുമെന്ന വിലയിരുത്തലിലാണ് പാർട്ടി ഹൈക്കമാൻഡ് അടിയന്തരമായി ഇടപെട്ടത്. വിവാദങ്ങൾക്ക് ഇതോടെ വിരാമമിടാനാണ് നേതൃത്വത്തിന്റെ നീക്കം.