‘മുഖ്യമന്ത്രി കത്തുകൾ അവഗണിച്ചു, റസൂൽ പൂക്കുട്ടിയും കൂടെ നിന്നില്ല’; സംവിധായകൻ പി.ടി. കുഞ്ഞുമുഹമ്മദിനെതിരായ കേസിൽ അതിജീവിതയുടെ വെളിപ്പെടുത്തൽ

പ്രമുഖ സംവിധായകൻ പി.ടി. കുഞ്ഞുമുഹമ്മദ് പ്രതിയായ ലൈംഗികാതിക്രമക്കേസിൽ സർക്കാരിനും ചലച്ചിത്ര അക്കാദമിക്കുമെതിരെ കടുത്ത ആരോപണങ്ങളുമായി അതിജീവിത ഡോ. ആശ ആച്ചി ജോസഫ്. നീതി തേടി മുഖ്യമന്ത്രി പിണറായി വിജയന് ആറോ ഏഴോ കത്തുകൾ അയച്ചിട്ടും അവ പൂർണ്ണമായും അവഗണിക്കപ്പെട്ടുവെന്ന് അവർ പറഞ്ഞു. ഒരു കത്തിന് മാത്രമാണ് ‘ലഭിച്ചു’ എന്ന മറുപടി എങ്കിലും കിട്ടിയതെന്ന് അവർ മീഡിയവണിന് നൽകിയ പ്രത്യേക അഭിമുഖത്തിൽ വ്യക്തമാക്കി.

പരാതി നൽകിയതിന് ശേഷം തുടർനടപടികളിൽ അധികൃതരുടെ ഭാഗത്തുനിന്നും ഗുരുതരമായ വീഴ്ചകൾ ഉണ്ടായതായാണ് ഡോ. ആശ ആരോപിക്കുന്നത്. ലൈംഗികാതിക്രമങ്ങൾ തടയുന്നതിനുള്ള പോഷ് (POSH) നിയമപ്രകാരം കേസെടുക്കുന്നതിന് മുൻപ് പരാതിക്കാരിയായ തന്റെ അഭിപ്രായം തേടേണ്ടതായിരുന്നു. എന്നാൽ അത്തരമൊരു നടപടിയും അധികൃതരുടെ ഭാഗത്തുനിന്നുണ്ടായില്ലെന്നും മറുപടി പ്രതീക്ഷിച്ചാണ് താൻ കത്തുകൾ അയച്ചതെന്നും അവർ കൂട്ടിച്ചേർത്തു.

സംസ്ഥാന ചലച്ചിത്ര അക്കാദമി ചെയർമാൻ റസൂൽ പൂക്കുട്ടിക്കെതിരെയും ആശ രൂക്ഷമായ വിമർശനം ഉയർത്തി. വ്യക്തിപരമായി തന്നെ വിളിച്ച് ‘കൂടെയുണ്ട്’ എന്ന് റസൂൽ പൂക്കുട്ടി പറഞ്ഞിരുന്നു. എന്നാൽ അക്കാദമി ചെയർമാൻ എന്ന നിലയിൽ ആ സ്ഥാനത്തിരുന്ന് നിർവ്വഹിക്കേണ്ട ഉത്തരവാദിത്തങ്ങളിൽ അദ്ദേഹം പരാജയപ്പെട്ടുവെന്ന് അവർ കുറ്റപ്പെടുത്തി. തന്റെ നിലപാടിന് ഔദ്യോഗികമായ പിന്തുണ നൽകുന്നതിൽ ചെയർമാൻ വീഴ്ച വരുത്തിയതായാണ് അവർ ചൂണ്ടിക്കാട്ടുന്നത്.

സിനിമയ്ക്കകത്തെ സ്ത്രീ സുരക്ഷയെക്കുറിച്ച് വലിയ ചർച്ചകൾ നടക്കുന്ന സാഹചര്യത്തിലാണ് ഇങ്ങനെയൊരു വെളിപ്പെടുത്തൽ വരുന്നത്. ഹേമ കമ്മിറ്റി റിപ്പോർട്ട് പുറത്തുവന്നതിന് ശേഷം സിനിമ മേഖലയിലെ അതിക്രമങ്ങൾക്കെതിരെ പരാതിയുമായി എത്തിയവർക്ക് സർക്കാർ കൃത്യമായ പിന്തുണ നൽകുന്നില്ലെന്ന ആക്ഷേപം ഡോ. ആശയുടെ വാക്കുകളിലൂടെ ഒരിക്കൽ കൂടി ശക്തമാവുകയാണ്.

മീഡിയവൺ എഡിറ്റർ പ്രമോദ് രാമനുമായി ഡോ. ആശ ആച്ചി ജോസഫ് നടത്തിയ ഈ പ്രത്യേക അഭിമുഖത്തിന്റെ പൂർണ്ണരൂപം ഇന്ന് (ഫെബ്രുവരി 16) വൈകിട്ട് അഞ്ച് മണിക്ക് ചാനലിൽ സംപ്രേക്ഷണം ചെയ്യും. കേസിന്റെ നാൾവഴികളെക്കുറിച്ചും താൻ നേരിട്ട അവഗണനകളെക്കുറിച്ചും കൂടുതൽ വെളിപ്പെടുത്തലുകൾ അഭിമുഖത്തിൽ ഉണ്ടാകുമെന്നാണ് സൂചന.