‘ആഭ്യന്തരം വേണം, അല്ലെങ്കിൽ മന്ത്രിസഭയിലേക്കില്ല’; ഹൈക്കമാൻഡിനെ സമ്മർദ്ദത്തിലാക്കി രമേശ് ചെന്നിത്തല

തിരുവനന്തപുരം: യു.ഡി.എഫ് മന്ത്രിസഭാ രൂപീകരണ ചർച്ചകൾ പുരോഗമിക്കവേ കോൺഗ്രസിൽ പുതിയ പ്രതിസന്ധി. പുതിയ മന്ത്രിസഭയിൽ ആഭ്യന്തര വകുപ്പ് തനിക്ക് ലഭിക്കണമെന്ന കർശന നിലപാടുമായി മുതിർന്ന നേതാവ് രമേശ് ചെന്നിത്തല രംഗത്തെത്തി. ആഭ്യന്തര വകുപ്പ് ലഭിച്ചില്ലെങ്കിൽ മന്ത്രിസഭയുടെ ഭാഗമാകാൻ താനില്ലെന്ന് അദ്ദേഹം നേതൃത്വത്തെ അറിയിച്ചതായാണ് വിവരം. ഇത് കോൺഗ്രസ് ഹൈക്കമാൻഡിനെയും സംസ്ഥാന നേതൃത്വത്തെയും കടുത്ത പ്രതിസന്ധിയിലാക്കിയിരിക്കുകയാണ്.

ആഭ്യന്തര വകുപ്പിന് പുറമെ മറ്റൊരു സുപ്രധാന ആവശ്യവും ചെന്നിത്തല മുന്നോട്ട് വെച്ചിട്ടുണ്ട്. തന്റെ വിശ്വസ്തനായ ജോസഫ് വാഴയ്ക്കനെ കെ.പി.സി.സി പ്രസിഡന്റായി നിയമിക്കണം എന്നതാണ് ആ ആവശ്യം. മന്ത്രിസഭാ രൂപീകരണത്തിനൊപ്പം പാർട്ടി നേതൃത്വത്തിലും തന്റെ സ്വാധീനം ഉറപ്പിക്കാനുള്ള ചെന്നിത്തലയുടെ തന്ത്രപരമായ നീക്കമായാണ് രാഷ്ട്രീയ നിരീക്ഷകർ ഇതിനെ വിലയിരുത്തുന്നത്. ഈ രണ്ട് ആവശ്യങ്ങളും അംഗീകരിക്കാതെ യാതൊരു വിട്ടുവീഴ്ചയ്ക്കും തയ്യാറല്ലെന്ന ഉറച്ച നിലപാടിലാണ് അദ്ദേഹം.

ചെന്നിത്തലയുടെ ഈ സമ്മർദ്ദ തന്ത്രത്തിന് പിന്നാലെ അനുനയ നീക്കങ്ങളുമായി സംസ്ഥാന നേതൃത്വം സജീവമായിട്ടുണ്ട്. വിഷയത്തിൽ ഹൈക്കമാൻഡ് നേരിട്ട് ഇടപെടുമെന്ന് കെ.പി.സി.സി അധ്യക്ഷൻ കെ. സുധാകരൻ വ്യക്തമാക്കി. “മുഖ്യമന്ത്രിക്ക് തന്നെ ആഭ്യന്തര വകുപ്പ് നൽകണമോ അതോ ചെന്നിത്തലയുടെ ആവശ്യം പരിഗണിക്കണമോ എന്ന് തീരുമാനിക്കേണ്ടത് ഹൈക്കമാൻഡാണ്,” സുധാകരൻ മാധ്യമങ്ങളോട് പ്രതികരിച്ചു. ഇത് സംബന്ധിച്ച് ഉടൻ തന്നെ തീരുമാനമുണ്ടാകുമെന്നാണ് പ്രതീക്ഷിക്കുന്നത്.

അതേസമയം, കോൺഗ്രസിലെ ഗ്രൂപ്പ് സമവാക്യങ്ങളെക്കുറിച്ചും മന്ത്രിസ്ഥാനങ്ങളെക്കുറിച്ചും ചോദിച്ചപ്പോൾ സുധാകരൻ ഒഴിഞ്ഞുമാറി. കെ.സി വേണുഗോപാൽ പക്ഷത്തിന് എത്ര മന്ത്രിമാർ ഉണ്ടാകുമെന്ന മാധ്യമപ്രവർത്തകരുടെ ചോദ്യത്തിന്, “എനിക്കറിയില്ല, എണ്ണി നോക്കേണ്ടി വരും,” എന്നായിരുന്നു അദ്ദേഹത്തിന്റെ മറുപടി. മന്ത്രിസഭാ രൂപീകരണം പൂർത്തിയാകുന്നതിന് മുൻപ് തന്നെ കോൺഗ്രസിനുള്ളിലെ അധികാര വടംവലി മറനീക്കി പുറത്തുവരുന്നത് യു.ഡി.എഫിന് വലിയ തലവേദനയാണ് സൃഷ്ടിക്കുന്നത്.