പ്രായപൂർത്തിയാകാത്ത കുട്ടിയോട് ലൈംഗികാതിക്രമം: മലയാളി കത്തോലിക്കാ പുരോഹിതൻ കാനഡയിൽ അറസ്റ്റിൽ

പ്രായപൂർത്തിയാകാത്ത കുട്ടിയോട് ലൈംഗികാതിക്രമം നടത്തിയ കേസിൽ മലയാളി കത്തോലിക്കാ പുരോഹിതനെ കനേഡിയൻ പോലീസ് അറസ്റ്റ് ചെയ്തു. കേരളത്തിലെ സീറോ-മലബാർ സഭയുടെ താമരശ്ശേരി രൂപതാംഗമായ ഫാ. ജെയിംസ് ചേരിക്കൽ (60) ആണ് പീൽ റീജിയണൽ പോലീസിന്റെ പിടിയിലായത്. 16 വയസ്സിൽ താഴെയുള്ള കുട്ടികൾക്കെതിരായ ലൈംഗിക കുറ്റകൃത്യങ്ങൾ തടയുന്നതിനുള്ള കനേഡിയൻ നിയമപ്രകാരം ഡിസംബർ 18-നാണ് ഇദ്ദേഹത്തെ അറസ്റ്റ് ചെയ്തത്.

അറസ്റ്റ് വിവരമറിഞ്ഞ ഉടൻ തന്നെ ടൊറന്റോ അതിരൂപത ഫാ. ജെയിംസ് ചേരിക്കലിനെതിരെ കർശന നടപടി സ്വീകരിച്ചു. ഇദ്ദേഹത്തെ സഭയുടെ പാസ്റ്ററൽ ശുശ്രൂഷകളിൽ നിന്നും മറ്റ് ഔദ്യോഗിക പദവികളിൽ നിന്നും നീക്കം ചെയ്തതായി അതിരൂപത പ്രസ്താവനയിലൂടെ അറിയിച്ചു.

ബ്രാംപ്ടണിലെ സെന്റ് ജെറോംസ് കത്തോലിക്കാ പള്ളിയിൽ പാസ്റ്ററായി സേവനമനുഷ്ഠിക്കവെയാണ് ഇദ്ദേഹത്തിനെതിരെ മോശം പെരുമാറ്റത്തെക്കുറിച്ചുള്ള പരാതി ഉയർന്നത്.

പുരോഹിതന്റെ അറസ്റ്റിനെത്തുടർന്ന് അദ്ദേഹം സേവനമനുഷ്ഠിച്ചിരുന്ന പള്ളിയിലെ ശുശ്രൂഷകൾക്കും തടസ്സം നേരിട്ടു. ഡിസംബർ 25 മുതൽ ജനുവരി 3 വരെയുള്ള കാലയളവിലെ വിശുദ്ധ കുർബാന ഉൾപ്പെടെയുള്ള ചടങ്ങുകൾ റദ്ദാക്കിയതായി പള്ളി അധികൃതർ അറിയിച്ചു. കാനഡയിലെ വിശ്വാസികൾക്കിടയിൽ ഈ സംഭവം വലിയ ഞെട്ടലുണ്ടാക്കിയിട്ടുണ്ട്. അന്വേഷണം പൂർത്തിയാകുന്നത് വരെ പുരോഹിതന് നിയന്ത്രണങ്ങൾ ഏർപ്പെടുത്താനാണ് സഭയുടെ തീരുമാനം.

ഏകദേശം മൂന്ന് പതിറ്റാണ്ടോളമായി ഫാ. ജെയിംസ് ചേരിക്കൽ ടൊറന്റോ അതിരൂപതയ്ക്ക് കീഴിലുള്ള വിവിധ ഇടവകകളിൽ പ്രവർത്തിച്ചുവരികയായിരുന്നു. 1997-ലാണ് അദ്ദേഹം കാനഡയിലേക്ക് സേവനത്തിനായി എത്തിയത്. കാനഡയിലെ കേരളീയ കത്തോലിക്കാ കുടിയേറ്റക്കാർക്കായി പ്രവർത്തിക്കുന്ന സീറോ-മലബാർ മിഷനിലും അദ്ദേഹം സജീവമായിരുന്നു. കഴിഞ്ഞ വർഷമാണ് അദ്ദേഹം നിലവിൽ പ്രവർത്തിക്കുന്ന ബ്രാംപ്ടണിലെ പള്ളിയിലേക്ക് ചുമതലയേറ്റത്.

കോഴിക്കോട് സ്വദേശിയായ ഫാ. ജെയിംസ് ചേരിക്കൽ കാനഡയിലേക്ക് പോകുന്നതിന് മുൻപ് താമരശ്ശേരി രൂപതയിൽ വിവിധ തന്ത്രപ്രധാനമായ പദവികൾ വഹിച്ചിരുന്നു. വൈദികനെതിരെ ഉയർന്നിട്ടുള്ള ആരോപണത്തെ ഗൗരവകരമായ ശ്രദ്ധ ആവശ്യമുള്ള വിഷയമായാണ് ടൊറന്റോ അതിരൂപത കാണുന്നത്. കനേഡിയൻ നിയമവ്യവസ്ഥ പ്രകാരം കുറ്റവിചാരണ നേരിടുന്ന ഇദ്ദേഹം, കുറ്റക്കാരനാണെന്ന് തെളിയുന്നത് വരെ നിരപരാധിയായി കണക്കാക്കപ്പെടുമെന്നും അതിരൂപത വ്യക്തമാക്കി.