സാങ്കേതിക തകരാർ പരിഹരിച്ചു ബ്രിട്ടീഷ് യുദ്ധവിമാനം തിരികെ പറന്നു

തിരുവനന്തപുരം: സാങ്കേതിക തകരാറിനെ തുടർന്ന് ഒരു മാസത്തിലേറെയായി തിരുവനന്തപുരം അന്താരാഷ്ട്ര വിമാനത്താവളത്തിൽ കുടുങ്ങിക്കിടന്ന ബ്രിട്ടീഷ് റോയൽ നേവിയുടെ F-35B യുദ്ധവിമാനം തിരികെ പറന്നു. 37 ദിവസത്തെ കാത്തിരിപ്പിന് ശേഷമാണ് വിമാനം ചൊവ്വാഴ്ച തിരുവനന്തപുരത്ത് നിന്ന് പറന്നുയർന്നത്.

ജൂൺ 14-നാണ് ഇന്ധനം കുറഞ്ഞതിനെ തുടർന്നും ഹൈഡ്രോളിക് സംവിധാനത്തിലെ തകരാറിനെ തുടർന്നുമെല്ലാം F-35B യുദ്ധവിമാനം തിരുവനന്തപുരം വിമാനത്താവളത്തിൽ അടിയന്തരമായി ഇറക്കിയത്. അറബിക്കടലിൽ ഇന്ത്യൻ നാവികസേനയുമായി സംയുക്ത സൈനികാഭ്യാസത്തിൽ ഏർപ്പെട്ടിരുന്ന എച്ച്.എം.എസ്. പ്രിൻസ് ഓഫ് വെയിൽസ് എന്ന ബ്രിട്ടീഷ് യുദ്ധക്കപ്പലിൽ നിന്നാണ് ഈ വിമാനം പറന്നുയർന്നത്.

വിമാനത്തിൻ്റെ ഹൈഡ്രോളിക് സംവിധാനത്തിനും ഓക്സിലറി പവർ യൂണിറ്റിനും സംഭവിച്ച തകരാറുകൾ പരിഹരിക്കുന്നതിനായി ബ്രിട്ടനിൽ നിന്നും അമേരിക്കയിൽ നിന്നുമുള്ള വിദഗ്ധർ തിരുവനന്തപുരത്തെത്തിയിരുന്നു. ജൂലൈ 6-നാണ് ഇവർ തിരുവനന്തപുരത്ത് എത്തിയത്. എയർ ഇന്ത്യയുടെ ഹാങ്ങറിലേക്ക് മാറ്റിയ ശേഷമാണ് വിമാനത്തിൻ്റെ അറ്റകുറ്റപ്പണികൾ പൂർത്തിയാക്കിയത്.