ബിശ്വനാഥ് സിൻഹ കേരളത്തിന്റെ പുതിയ ചീഫ് സെക്രട്ടറി

കേരളത്തിന്‍റെ പുതിയ ചീഫ് സെക്രട്ടറിയായി നിലവിലെ ആഭ്യന്തരവകുപ്പ് അഡീഷണൽ ചീഫ് സെക്രട്ടറി ബിശ്വനാഥ് സിൻഹയെ നിയമിക്കാൻ സർക്കാർ തീരുമാനിച്ചു. ഇന്ന് രാവിലെ മുഖ്യമന്ത്രിയുടെ അധ്യക്ഷതയിൽ ചേർന്ന മന്ത്രിസഭാ യോഗത്തിലാണ് ഇതുസംബന്ധിച്ച സുപ്രധാന തീരുമാനമുണ്ടായത്. നിലവിലെ ചീഫ് സെക്രട്ടറി എ. ജയതിലകിന്റെ കാലാവധി ഈ മാസം 30-ന് അവസാനിക്കുന്ന സാഹചര്യത്തിലാണ് പുതിയ നിയമനം.

സംസ്ഥാന സർവീസിലെ ഏറ്റവും സീനിയറായ ഐഎഎസ് ഉദ്യോഗസ്ഥരിലൊരാളായ ബിശ്വനാഥ് സിൻഹ 1991 ബാച്ചുകാരനാണ്. ബിഹാർ സ്വദേശിയായ അദ്ദേഹം, ഡൽഹി സ്‌കൂൾ ഓഫ് ഇകണോമിക്‌സിലെ പഠനത്തിന് ശേഷമാണ് സിവിൽ സർവീസിൽ പ്രവേശിച്ചത്. കോട്ടയം, വയനാട്, കോഴിക്കോട് എന്നീ ജില്ലകളിൽ കലക്ടറായി മികച്ച സേവനം കാഴ്ചവെച്ച അദ്ദേഹം, മൂന്ന് പതിറ്റാണ്ടിലേറെ നീണ്ട തന്റെ ഔദ്യോഗിക ജീവിതത്തിനിടയിൽ വിവിധ വകുപ്പുകളിൽ നിർണ്ണായക സ്ഥാനങ്ങൾ വഹിച്ചിട്ടുണ്ട്.

ടെക്‌സ്‌റ്റൈൽസ് ഡയറക്ടർ, സ്റ്റേറ്റ് കോ-ഓപ്പറേറ്റീവ് ബാങ്ക് മാനേജിങ് ഡയറക്ടർ, പൊതുമരാമത്ത്-കായിക വകുപ്പുകളിൽ സെക്രട്ടറി, ഡൽഹി കേരള ഹൗസ് അഡീഷണൽ റസിഡന്റ് കമ്മീഷണർ തുടങ്ങിയ പദവികളിൽ അദ്ദേഹം പ്രവർത്തിച്ചിട്ടുണ്ട്. കൂടാതെ, വനം-പരിസ്ഥിതി മന്ത്രാലയം, ഫിനാൻസ്, സാമൂഹ്യ നീതി, എസ്സി/എസ്ടി ക്ഷേമം തുടങ്ങി നിരവധി പ്രധാന വകുപ്പുകളിൽ പ്രിൻസിപ്പൽ സെക്രട്ടറിയായും അദ്ദേഹം സേവനമനുഷ്ഠിച്ചിട്ടുണ്ട്.

ഇതോടൊപ്പം ഉന്നത വിദ്യാഭ്യാസ രംഗത്തും ചില മാറ്റങ്ങൾക്ക് മന്ത്രിസഭ തീരുമാനമെടുത്തിട്ടുണ്ട്. കേരള സർവകലാശാലയിലെ ബയോഇൻഫോർമാറ്റിക്സ് വകുപ്പ് തലവനായിരുന്ന അച്യുത് ശങ്കറിനെ ഉന്നത വിദ്യാഭ്യാസ കൗൺസിൽ വൈസ് ചെയർമാനായി നിയമിക്കാൻ തീരുമാനിച്ചു. സി-ഡിറ്റ് ഡയറക്ടറായും പ്രവർത്തിച്ചിട്ടുള്ള ഇദ്ദേഹം, കോൺഗ്രസ് നേതൃത്വത്തിൽ നടന്ന ഉന്നത വിദ്യാഭ്യാസ കോൺക്ലേവിന് നേതൃത്വം നൽകിയിരുന്നു. പുതിയ നിയമനങ്ങൾ സംബന്ധിച്ച ഔദ്യോഗിക ഉത്തരവ് ഉടൻ പുറത്തിറങ്ങും.