വെളളാപ്പള്ളിയുടെ പ്രസ്താവനയ്ക്ക് പിന്നില്‍ കൃത്യമായ അജണ്ട, സ്‌പോണ്‍സര്‍ ചെയ്യുന്നത് മുഖ്യമന്ത്രി-പിവി അന്‍വര്‍

എസ്.എന്‍.ഡി.പി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍ നടത്തുന്ന വര്‍ഗീയ പ്രസ്താവനകളെ സ്‌പോണ്‍സര്‍ ചെയ്യുന്നത് മുഖ്യമന്ത്രി പിണറായി വിജയനാണെന്ന് പി.വി. അന്‍വര്‍ എം.എല്‍.എ. വെള്ളാപ്പള്ളിയുടെ വര്‍ഗീയ പരാമര്‍ശങ്ങള്‍ക്കെതിരെ സര്‍ക്കാര്‍ നടപടിയെടുക്കാത്തത് ഈ സ്‌പോണ്‍സര്‍ഷിപ്പുള്ളതുകൊണ്ടാണെന്നും അദ്ദേഹം പ്രസ്താവനയില്‍ ആരോപിച്ചു.

‘വെള്ളാപ്പള്ളി നടേശന്‍ നടത്തുന്ന പ്രസ്താവനകള്‍ അവിചാരിതമല്ല. വ്യക്തമായ അജണ്ട വെച്ച്, ലക്ഷ്യം മുന്നില്‍ കണ്ടാണ് ഈ പറയുന്നതൊക്കെയും. ഇത്രയും വര്‍ഗീയത അദ്ദേഹം മൈക്ക് കെട്ടി വിളിച്ചു പറഞ്ഞിട്ടും ഭരണകൂടം നടപടിയെടുക്കാത്തതില്‍ അത്ഭുതമില്ല, കാരണം ഈ പരിപാടി സ്‌പോണ്‍സര്‍ ചെയ്യുന്നത് മുഖ്യമന്ത്രിയാണ്,’ പി.വി. അന്‍വര്‍ പറഞ്ഞു.

തിരഞ്ഞെടുപ്പിന് മുമ്പ് നിലമ്പൂരില്‍ വെള്ളാപ്പള്ളി നടേശന്‍ നടത്തിയ വര്‍ഗീയ വിദ്വേഷം നിറഞ്ഞ പരാമര്‍ശങ്ങള്‍ എല്ലാവരും കേട്ടതാണ്. എന്നിട്ടും അദ്ദേഹത്തെ വലിയ വേദികളില്‍ ആദരിക്കാനും പ്രശംസിക്കാനും മുഖ്യമന്ത്രി കാണിച്ച ധൈര്യം ഈ നാട്ടിലെ സാധാരണക്കാരോടും സഖാക്കളോടും ഉള്ള വെല്ലുവിളിയാണെന്നും അന്‍വര്‍ വിലയിരുത്തി.

കമ്മ്യൂണിസ്റ്റ് പാര്‍ട്ടിയില്‍ നാടിന്റെ മതേതരത്വം സംരക്ഷിക്കപ്പെടണം എന്ന് ആഗ്രഹിക്കുന്നവര്‍ ഇനിയും ബാക്കിയുണ്ടെങ്കില്‍ ഈ വര്‍ഗീയ വിഷം തുപ്പുന്നതിനെതിരെ പ്രതികരിച്ചേ മതിയാകൂ. വര്‍ഗീയതയാണ് അജണ്ടയെങ്കില്‍ മുഖ്യമന്ത്രിയെ ഇനിയും പരാജയങ്ങള്‍ കാത്തിരിക്കുന്നുണ്ടെന്ന് ഓര്‍ക്കണമെന്നും അദ്ദേഹം മുന്നറിയിപ്പ് നല്‍കി. നിലമ്പൂരിലെ ജനങ്ങള്‍ വര്‍ഗീയതയെ എങ്ങനെ തള്ളിക്കളഞ്ഞു എന്നത് ഒരു പാഠമാണ്.

ഒരു ഭരണാധികാരി തന്റെ പരാജയം മറച്ചുവെക്കാന്‍ വര്‍ഗീയതയെ കൂട്ടുപിടിക്കുമ്പോള്‍, അതിനെതിരെ ആദ്യം ശബ്ദമുയര്‍ത്തുന്നത് ഇവിടുത്തെ ഹൈന്ദവ സഹോദരങ്ങളാണെന്ന് മുഖ്യമന്ത്രി മനസ്സിലാക്കുന്നിടത്ത് അദ്ദേഹം പരാജയപ്പെട്ടുവെന്നും പി.വി. അന്‍വര്‍ കൂട്ടിച്ചേര്‍ത്തു.

പിവി അന്‍വറുടെ പ്രസ്താവന വായിക്കാം