ആലുവയിൽ എൽ.ഡി.എഫ് സ്ഥാനാർത്ഥിയായി എ.എം. ആരിഫ്? അന്‍വർ സാദത്തിന് ചെക്ക് വെക്കാന്‍ സിപിഎം

ആലുവ: വരാനിരിക്കുന്ന നിയമസഭാ തിരഞ്ഞെടുപ്പിൽ ആലുവ മണ്ഡലത്തിലെ എൽ.ഡി.എഫ് സ്ഥാനാർത്ഥി പട്ടികയിലേക്ക് മുൻ എം.പി എ.എം. ആരിഫിന്റെ പേരും പരിഗണിക്കുന്നു. നിലവിൽ സിറ്റിംഗ് എം.എൽ.എ ആയ അൻവർ സാദത്തിനെതിരെ ശക്തനായ ഒരു സ്ഥാനാർത്ഥിയെ അണിനിരത്തി മണ്ഡലം പിടിച്ചെടുക്കാനുള്ള നീക്കത്തിലാണ് ഇടതുമുന്നണി.

കഴിഞ്ഞ കുറച്ചു കാലമായി യു.ഡി.എഫിന്റെ ഉറച്ച കോട്ടയായി തുടരുന്ന ആലുവയിൽ, ജനപ്രിയ മുഖമായ എ.എം. ആരിഫിനെ ഇറക്കുന്നത് ഗുണകരമാകുമെന്നാണ് മുന്നണിയുടെ വിലയിരുത്തൽ. ആലപ്പുഴയിൽ നിന്നുള്ള മുൻ എം.പി എന്ന നിലയിലുള്ള ആരിഫിന്റെ രാഷ്ട്രീയ പരിചയവും സ്വീകാര്യതയും വോട്ടായി മാറുമെന്ന് പാർട്ടി കണക്കുകൂട്ടുന്നു.

യു.ഡി.എഫ് സ്ഥാനാർത്ഥിയായി അൻവർ സാദത്ത് തന്നെ വീണ്ടും ജനവിധി തേടുമെന്ന് ഏകദേശം ഉറപ്പായിട്ടുണ്ട്. മണ്ഡലത്തിലെ വ്യക്തിപരമായ സ്വാധീനമാണ് അദ്ദേഹത്തിന്റെ കരുത്ത്. ഈ സ്വാധീനത്തെ മറികടക്കാൻ ആരിഫിനെപ്പോലൊരു നേതാവിന് സാധിക്കുമെന്നാണ് സി.പി.എം പ്രാദേശിക നേതൃത്വത്തിന്റെയും താല്പര്യം.

നേരത്തെ ആലുവ മണ്ഡലം പിടിച്ചെടുക്കാൻ പല പ്രമുഖരെയും എൽ.ഡി.എഫ് പരീക്ഷിച്ചിരുന്നെങ്കിലും വിജയം കണ്ടിരുന്നില്ല. എന്നാൽ ഇത്തവണ എ.എം. ആരിഫ് എത്തുന്നതോടെ പോരാട്ടം കടുക്കുമെന്നുറപ്പാണ്. സ്ഥാനാർത്ഥി നിർണയം സംബന്ധിച്ച അന്തിമ തീരുമാനം ഉടൻ ഉണ്ടാകുമെന്നാണ് സൂചന.