‘എന്ത് വിധി?’ വളരെ ശ്രദ്ധാപൂർവ്വം തയ്യാറാക്കിയ ഒരു തിരക്കഥ വളരെ ക്രൂരമായി വികസിപ്പിക്കുന്നതാണ് നമ്മളിപ്പോൾ കാണുന്നതെന്ന് പാർവതി

നടിയെ ആക്രമിച്ച കേസിൽ ദിലീപിനെ കുറ്റവിമുക്തനാക്കിയ കോടതി വിധിയിൽ രൂക്ഷമായ പ്രതികരണവുമായി നടി പാർവ്വതി തിരുവോത്ത്. “വളരെ ശ്രദ്ധാപൂർവ്വം തയ്യാറാക്കിയ ഒരു തിരക്കഥ വളരെ ക്രൂരമായി വികസിക്കുന്നതാണ് ഇപ്പോൾ നമ്മൾ കാണുന്നത്” എന്നാണ് പാർവതി തൻ്റെ സോഷ്യൽ മീഡിയയിൽ കുറിച്ചത്. കേസിൽ ഒന്ന് മുതൽ ആറ് വരെയുള്ള പ്രതികൾ കുറ്റക്കാരാണെന്നും എന്നാൽ ഗൂഢാലോചന കുറ്റം തെളിയിക്കാൻ സാധിക്കാത്തതിനാൽ എട്ടാം പ്രതിയായ ദിലീപിനെ വെറുതെ വിടുകയാണെന്നും കോടതി വിധിച്ചതിന് തൊട്ടുപിന്നാലെയാണ് പാർവ്വതിയുടെ പ്രതികരണം.

പാർവ്വതിക്ക് പുറമെ നടി റിമ കല്ലിങ്കലും വിധിയോട് പ്രതികരിച്ച് രംഗത്തെത്തി. ‘അവള്‍ക്കൊപ്പം’ എന്ന് എഴുതിയ ബാനറിന്‍റെ ചിത്രം സോഷ്യല്‍ മീഡിയയില്‍ പങ്കുവെച്ചുകൊണ്ടാണ് റിമ തൻ്റെ നിലപാട് വ്യക്തമാക്കിയത്. “എപ്പോഴും, മുൻപത്തേതിലും ശക്തമായി, ഇപ്പോൾ…” എന്ന വരികളും റിമ ചിത്രത്തിനൊപ്പം കുറിച്ചിട്ടുണ്ട്. ഡബ്ല്യുസിസിയിലെ സജീവ സാന്നിധ്യമായ ഇവർ വിധി വന്ന ഉടനടി നടത്തിയ പ്രതികരണങ്ങൾ ഏവരും ആകാംക്ഷയോടെയാണ് ഉറ്റുനോക്കുന്നത്.

നീതി നിഷേധത്തിൻ്റെ ഷോക്കിലാണ് അതിജീവിതയെന്ന് ഡബ്ബിംഗ് ആർട്ടിസ്റ്റ് ഭാഗ്യലക്ഷ്മി ഏഷ്യാനെറ്റ് ന്യൂസിനോട് പ്രതികരിച്ചു. മരണം വരെ താൻ അവൾക്കൊപ്പം ഉണ്ടാകുമെന്നും മഞ്ജു വാര്യർക്ക് എതിരായ ആക്ഷേപം അനാവശ്യമാണെന്നും അവർ പറഞ്ഞു. കൂടാതെ, അമ്മ സംഘടന ഈ വിധി ആഘോഷിക്കുമെന്നും അത് വരും ദിവസങ്ങളിൽ കാണാമെന്നും ഭാഗ്യലക്ഷ്മി കൂട്ടിച്ചേർത്തു.

കേസിലെ ഒന്ന് മുതൽ ആറ് വരെയുള്ള പ്രതികളായ പൾസർ സുനി, മാർട്ടിൻ ആന്റണി, മണികണ്ഠൻ, വി.പി. വിജീഷ്, എച്ച്. സലിം, പ്രദീപ് എന്നിവർ കുറ്റക്കാരാണെന്ന് കോടതി കണ്ടെത്തി. എന്നാൽ കൃത്യത്തിൽ നേരിട്ട് പങ്കെടുത്തില്ലെങ്കിലും സംഭവത്തിൻ്റെ മുഖ്യ ആസൂത്രകൻ ദിലീപ് ആണെന്നും, ബലാത്സംഗത്തിന് ക്വട്ടേഷൻ നൽകി എന്നുമുള്ള പ്രോസിക്യൂഷൻ വാദം തെളിയിക്കാൻ സാധിച്ചില്ലെന്ന് ചൂണ്ടിക്കാട്ടിയാണ് കോടതി ദിലീപിനെ കുറ്റവിമുക്തനാക്കിയത്.

2017 ഫെബ്രുവരി 17-ന് രാത്രി കൊച്ചിയിൽ ഓടിക്കൊണ്ടിരുന്ന വാഹനത്തിനുള്ളിൽ വെച്ച് നടി ആക്രമിക്കപ്പെട്ട സംഭവത്തിലാണ് ഇപ്പോൾ വിധി വന്നിരിക്കുന്നത്. ഷൂട്ടിങ്ങിനായി തൃശ്ശൂരിൽനിന്ന് എറണാകുളത്തേക്കുള്ള യാത്രയ്ക്കിടെ ക്വട്ടേഷൻ പ്രകാരം നടിയെ തട്ടിക്കൊണ്ടുപോയി അപകീർത്തികരമായ ദൃശ്യങ്ങൾ പകർത്തി എന്നതായിരുന്നു കേസ്. ദിലീപ് അടക്കം പത്തുപേരായിരുന്നു കേസിലെ പ്രതിപ്പട്ടികയിൽ ഉണ്ടായിരുന്നത്.