ചിന്തിപ്പിച്ചും ചിരിപ്പിച്ചും അയാള്‍ കടന്ന് പോയി, മലയാളത്തിന്റെ ശ്രീനിയ്ക്ക് വിട

മലയാള സിനിമയിലെ ഇതിഹാസ തുല്യനായ നടനും സംവിധായകനും തിരക്കഥാകൃത്തുമായ ശ്രീനിവാസൻ (69) അന്തരിച്ചു. അസുഖബാധിതനായി കൊച്ചിയിലെ സ്വകാര്യ ആശുപത്രിയിൽ ചികിത്സയിലിരിക്കെ ശനിയാഴ്ച രാവിലെയായിരുന്നു അന്ത്യം. ഏറെ കാലമായി ആരോഗ്യപ്രശ്നങ്ങളാൽ ചികിത്സയിലായിരുന്ന അദ്ദേഹം പൊതുവേദികളിൽ നിന്ന് വിട്ടുനിൽക്കുകയായിരുന്നു.

1956 ഏപ്രിൽ 6-ന് കണ്ണൂർ ജില്ലയിലെ തലശ്ശേരിക്ക് അടുത്തുള്ള പാട്യത്താണ് ശ്രീനിവാസൻ ജനിച്ചത്. ചെന്നൈ ഫിലിം ഇൻസ്റ്റിറ്റ്യൂട്ടിൽ നിന്ന് അഭിനയത്തിൽ ഡിപ്ലോമ നേടിയ ശേഷം 1977-ൽ പി.എ. ബക്കർ സംവിധാനം ചെയ്ത ‘മണിമുഴക്കം’ എന്ന ചിത്രത്തിലൂടെയാണ് അദ്ദേഹം സിനിമാരംഗത്തേക്ക് എത്തിയത്. പിന്നീട് കെ.ജി. ജോർജ് സംവിധാനം ചെയ്ത ‘മേള’യിലെ വേഷം ശ്രദ്ധിക്കപ്പെട്ടു.

1984-ൽ ‘ഓടരുതമ്മാവാ ആളറിയാം’ എന്ന ചിത്രത്തിന് തിരക്കഥ എഴുതിക്കൊണ്ടാണ് രചനാ രംഗത്തേക്ക് അദ്ദേഹം ചുവടുവെച്ചത്. നാടോടിക്കാറ്റ്, വരവേൽപ്പ്, സന്ദേശം, വടക്കുനോക്കിയന്ത്രം തുടങ്ങി മലയാളികൾ ഇന്നും നെഞ്ചിലേറ്റുന്ന ഒട്ടനവധി ഹിറ്റ് സിനിമകൾ അദ്ദേഹത്തിന്റെ തൂലികയിൽ പിറന്നവയാണ്. സാമൂഹിക പ്രശ്നങ്ങളെ ഹാസ്യത്തിന്റെ അകമ്പടിയോടെ അവതരിപ്പിക്കുന്നതിൽ അദ്ദേഹം പ്രത്യേക വൈഭവം പുലർത്തിയിരുന്നു.

1989-ൽ ‘വടക്കുനോക്കിയന്ത്രം’ എന്ന ചിത്രത്തിലൂടെ സംവിധാനരംഗത്തും അദ്ദേഹം തന്റെ മുദ്ര പതിപ്പിച്ചു. 1998-ൽ പുറത്തിറങ്ങിയ ‘ചിന്താവിഷ്ടയായ ശ്യാമള’ എന്ന ചിത്രം മികച്ച ജനപ്രീതിയും നിരൂപക പ്രശംസയും പിടിച്ചുപറ്റി. മികച്ച കഥ, തിരക്കഥ, സിനിമ എന്നീ വിഭാഗങ്ങളിലായി അഞ്ച് തവണ അദ്ദേഹം സംസ്ഥാന ചലച്ചിത്ര പുരസ്കാരങ്ങൾ നേടിയിട്ടുണ്ട്.

നടൻ, സംവിധായകൻ, തിരക്കഥാകൃത്ത്, നിർമ്മാതാവ്, ഡബ്ബിങ് ആർട്ടിസ്റ്റ് എന്നിങ്ങനെ സിനിമയുടെ വിവിധ മേഖലകളിൽ തനതായ വ്യക്തിമുദ്ര പതിപ്പിച്ചാണ് അദ്ദേഹം വിടവാങ്ങുന്നത്. കണ്ണൂർ സ്വദേശിയായ അദ്ദേഹം നിലവിൽ കൊച്ചി ഉദയംപേരൂരിലായിരുന്നു താമസം. മൃതദേഹം തൃപ്പൂണിത്തുറ താലൂക്ക് ആശുപത്രിയിലേക്ക് മാറ്റി.