‘അതുല്യം ഈ അനുഭവം’; ബിഹാറിലെ ‘മരിച്ചവർക്കൊപ്പം’ ചായ കുടിച്ച് രാഹുൽ ഗാന്ധി

ബിഹാറിലെ വോട്ടർ പട്ടികയിൽ നിന്ന് ‘മരിച്ചുപോയവർ’ എന്ന് രേഖപ്പെടുത്തി പുറത്താക്കിയവർക്കൊപ്പം ചായ കുടിച്ച് കോൺഗ്രസ് നേതാവും പ്രതിപക്ഷ നേതാവുമായ രാഹുൽ ഗാന്ധി. ഇതൊരു “അതുല്യമായ അനുഭവം” എന്ന് വിശേഷിപ്പിച്ച രാഹുൽ, തിരഞ്ഞെടുപ്പ് കമ്മീഷന് പരിഹാസ രൂപേണ നന്ദി പറയുകയും ചെയ്തു.

ബിഹാറിലെ പ്രത്യേക വോട്ടർ പട്ടിക പുനഃപരിശോധനയെത്തുടർന്ന് പട്ടികയിൽ നിന്ന് പുറത്തായ ഏഴംഗ സംഘവുമായാണ് രാഹുൽ ഗാന്ധി ഡൽഹിയിലെ തൻ്റെ വസതിയിൽ കൂടിക്കാഴ്ച നടത്തിയത്. ആർ.ജെ.ഡി നേതാവ് തേജസ്വി യാദവിന്റെ മണ്ഡലമായ രാഘോപൂരിൽ നിന്നുള്ളവരാണ് ഈ സംഘം.

“ജീവിതത്തിൽ രസകരമായ ഒരുപാട് അനുഭവങ്ങൾ ഉണ്ടായിട്ടുണ്ട്, പക്ഷേ ‘മരിച്ചവരോടൊപ്പം’ ചായ കുടിക്കാൻ എനിക്കൊരിക്കലും അവസരം ലഭിച്ചിട്ടില്ല. ഈ അതുല്യമായ അനുഭവത്തിന്, തിരഞ്ഞെടുപ്പ് കമ്മീഷന് നന്ദി,” കൂടിക്കാഴ്ചയുടെ വീഡിയോ പങ്കുവെച്ചുകൊണ്ട് രാഹുൽ ‘എക്സി’ൽ കുറിച്ചു.

വരാനിരിക്കുന്ന നിയമസഭാ തിരഞ്ഞെടുപ്പിന് മുന്നോടിയായി ബിഹാറിലെ വോട്ടർ പട്ടികയിൽ നിന്ന് പേര് നീക്കം ചെയ്യപ്പെട്ട 65 ലക്ഷം പേരിൽ ഉൾപ്പെട്ടവരാണ് ഇവർ. പട്ടികയിൽ പേര് തിരികെ ചേർക്കുന്നതുമായി ബന്ധപ്പെട്ട് സുപ്രീം കോടതിയെ സമീപിച്ച വിവരവും സംഘം രാഹുലിനെ ധരിപ്പിച്ചു.