മൊബൈൽ ഫോൺ ഉപയോഗം വിലക്കി: ‘കാശിക്ക് പോകുന്നു’ എന്ന് കത്തെഴുതിവെച്ച് പ്ലസ്‌ടു വിദ്യാർത്ഥി നാടുവിട്ടു

മൊബൈൽ ഫോൺ ഉപയോഗിക്കുന്നതും ഗെയിം കളിക്കുന്നതും മാതാപിതാക്കൾ വിലക്കിയതിൽ മനംനൊന്ത് 17കാരൻ നാടുവിട്ടു. കണ്ണൂർ പെരിങ്ങത്തൂർ സ്വദേശിയായ പ്ലസ്‌ടു വിദ്യാർത്ഥിയെയാണ് കാണാതായത്. താൻ കാശിയിലേക്ക് പോകുകയാണെന്നും ഇനിയുള്ള കാലം അവിടെ താമസിച്ച് ദൈവത്തോടൊപ്പം കഴിയാനാണ് ആഗ്രഹിക്കുന്നതെന്നും വ്യക്തമാക്കുന്ന കത്ത് എഴുതിവെച്ചാണ് വിദ്യാർത്ഥി വീടുവിട്ടിറങ്ങിയത്.

കഴിഞ്ഞ ശനിയാഴ്ച മുതലാണ് കുട്ടിയെ കാണാതായത്. മൊബൈൽ ഫോണിൽ പണം വെച്ചുള്ള ഓൺലൈൻ ഗെയിമുകൾ കളിക്കുന്നത് വിദ്യാർത്ഥിയുടെ പതിവായിരുന്നുവെന്നും ഇതിനായി കൂടുതൽ സമയം ചെലവഴിച്ചിരുന്നുവെന്നും പിതാവ് പറഞ്ഞു. ഗെയിം കളി കൂടിയതോടെ രക്ഷിതാക്കൾ ഇത് വിലക്കുകയും ഫോൺ വാങ്ങി സൂക്ഷിക്കുകയും ചെയ്തിരുന്നു. ഇതിലുണ്ടായ കടുത്ത മനോവിഷമമാണ് കുട്ടിയെ നാടുവിടാൻ പ്രേരിപ്പിച്ചതെന്നാണ് നിഗമനം.

സംഭവത്തിൽ ബന്ധുക്കളുടെ പരാതിയെ തുടർന്ന് പോലീസ് അന്വേഷണം ഊർജിതമാക്കിയിട്ടുണ്ട്. പെരിങ്ങത്തൂരും സമീപ പ്രദേശങ്ങളിലുമുള്ള പ്രമുഖ ജംഗ്ഷനുകളിലെയും റെയിൽവേ സ്റ്റേഷനുകളിലെയും സിസിടിവി ദൃശ്യങ്ങൾ കേന്ദ്രീകരിച്ചാണ് നിലവിൽ അന്വേഷണം പുരോഗമിക്കുന്നത്. എന്നാൽ നാടുവിട്ട കുട്ടിയെക്കുറിച്ച് ഇതുവരെ സൂചനകളൊന്നും ലഭിച്ചിട്ടില്ല.

കുട്ടിയെ കണ്ടെത്താനായി സമീപ ജില്ലകളിലെ പോലീസ് സ്റ്റേഷനുകളിലേക്കും വിവരങ്ങൾ കൈമാറിയിട്ടുണ്ട്. ഓൺലൈൻ ഗെയിം അഡിക്ഷനും അതിനെത്തുടർന്നുണ്ടാകുന്ന കുടുംബ പ്രശ്നങ്ങളും വർധിച്ചു വരുന്ന സാഹചര്യത്തിൽ, കുട്ടികളുടെ ഇത്തരം പെട്ടെന്നുള്ള തീരുമാനങ്ങൾ നാട്ടുകാരിലും വലിയ ആശങ്ക ഉളവാക്കിയിട്ടുണ്ട്.